इरानमा सरकारविरोधी प्रदर्शनः हालसम्म ५४३ जनाको मृत्यु

इरानमा दुई सातादेखि जारी सरकारविरोधी प्रदर्शनमा करिब ५०० जनाको मृत्यु भएको दाबी गरिएको छ।

अमेरिकास्थित मानवअधिकार संस्था एचआरएनएका अनुसार हालसम्म ४९५ जना प्रदर्शनकारी र ४८ जना सुरक्षाकर्मीको मृत्यु भइसकेको छ भने करिब १० हजार ६ सयभन्दा बढी व्यक्ति पक्राउ परेका छन् ।

इरान सरकारले भने मृत्युको आधिकारिक संख्या सार्वजनिक नगरेको र मानवअधिकारवादी समूहको दाबीमा सत्यता नभएको जनाएको छ । सुरुमा मुद्राको अवमूल्यन र महँगीविरुद्ध सुरु भएको प्रदर्शन अहिले सर्वोच्च नेता आयतोल्लाह अली खामेनीको पदच्युतिको मागमा परिणत भएको छ।

प्रदर्शन चर्किँदै गएपछि अमेरिकी राष्ट्रपति डोनाल्ड ट्रम्पले प्रदर्शनकारीको पक्षमा उभिने र उनीहरूमाथि गोली चले अमेरिकाले हस्तक्षेप गर्न सक्ने चेतावनी दिएका थिए।

इरानले यसलाई आफ्नो आन्तरिक मामिला भन्दै अमेरिकी हस्तक्षेप अस्वीकार गरेको छ । सर्वोच्च नेता खामेनीले हिंसात्मक प्रदर्शनकारीलाई आतंककारीको संज्ञा दिँदै कडा कदम चाल्ने चेतावनी दिएका छन् । स्थिति बिग्रँदै गएपछि देशभर इन्टरनेट सेवा अवरुद्ध गरिएको छ।