इरान–अमेरिका तनाव बढेपछि नेपालले जारी गर्यो ‘ट्राभल एडभाइजरी’ इरान भ्रमण नगर्न आग्रह

काठमाडौं । इरान र अमेरिकाबीच तनाव बढ्दै गएपछि नेपाल सरकारले इरान जाने योजना बनाएका नेपाली नागरिकलाई तत्काल यात्रा नगर्न आग्रह गरेको छ । परराष्ट्र मन्त्रालयले आज ‘ट्राभल एडभाइजरी’ जारी गर्दै यस्तो आग्रह गरेको हो ।

मन्त्रालयले जारी गरेको सूचनामा इरानको पछिल्लो सुरक्षा अवस्थालाई ध्यानमा राख्दै अवस्था सामान्य नहुँदासम्म इरान भ्रमण नगर्न सुझाव दिइएको छ । साथै, हाल इरानमा बसोबास गरिरहेका वा रोजगारीमा रहेका नेपाली नागरिकलाई सकेसम्म चाँडो देश छोड्न पनि आग्रह गरिएको छ ।

“इरानमा विकसित भइरहेको परिस्थितिलाई ध्यानमा राख्दै त्यहाँको अवस्था सामान्य नहुँदासम्म इरान भ्रमण गर्ने योजना स्थगित गर्न सल्लाह दिन्छौँ,” परराष्ट्र मन्त्रालयले जनाएको छ ।

मन्त्रालयले इरानमा रहेका नेपालीलाई पासपोर्ट, यात्रा कागजात तथा परिचयपत्रजस्ता महत्वपूर्ण कागजातहरू सजिलै भेटिने सुरक्षित स्थानमा राख्न पनि आग्रह गरेको छ ।