नेपाली विद्यार्थीले बनाएको ‘मुनाल’ उपग्रह आज प्रक्षेपण गरिँदै

ललितपुर । नेपाल विज्ञान तथा प्रविधि प्रज्ञा–प्रतिष्ठान (नास्ट) को पहलमा स्वदेशमै विकसित ‘मुनाल’ नामक उपग्रहको प्रक्षेपणको सबै तयारी पूरा भएको छ। उच्च माध्यमिक तहका विद्यार्थीहरूको नेतृत्वमा निर्माण गरिएको यो उपग्रह आज बिहान नेपाली समयअनुसार १० बजेर ३२ मिनेटमा प्रक्षेपण हुँदैछ।

नास्टका सचिव डा. रविन्द्रप्रसाद ढकालका अनुसार ‘मुनाल’ उपग्रह भारतीय अन्तरिक्ष अनुसन्धान संगठन (आइएसआरओ) को एसएलभी–सिक्स टू रकेटमार्फत भारतको श्रीहरिकोटास्थित सतीश धवन अन्तरिक्ष केन्द्रबाट ‘राइडसेयर पेलोड’का रूपमा प्रक्षेपण गरिनेछ।

करिब दुई वर्ष लगाएर तयार गरिएको उपग्रहले वनस्पति तथा वातावरणीय अनुगमन, स्वदेशी प्रविधिको परीक्षण र एआईमा आधारित डाटा प्रशोधन गर्नेछ। उपग्रहको सञ्चालन र निगरानी ललितपुरको खुमलटारस्थित ग्राउन्ड स्टेसनबाट गरिने नास्टले जनाएको छ।

विज्ञहरूका अनुसार ‘मुनाल’ उपग्रहको सफल प्रक्षेपणले नेपाललाई अन्तरिक्ष प्रविधि प्रयोग गर्ने राष्ट्रहरूको सूचीमा थप मजबुत रूपमा स्थापित गर्ने विश्वास गरिएको छ।