समानुपातिकतर्फको उम्मेदवारी आज साँझसम्म फिर्ता लिन सकिने

काठमाडौं । आगामी फागुन २१ गते हुने प्रतिनिधिसभा निर्वाचनका लागि समानुपातिक प्रणालीतर्फका उम्मेदवारले आज अपराह्न ४ बजेसम्म उम्मेदवारी फिर्ता लिन सक्नेछन्।

निर्वाचन आयोगले जारी गरेको सूचनाअ नुसार प्रतिनिधिसभा सदस्य निर्वाचनका क्रममा राजनीतिक दलहरूले पुस १३ र १४ गते पेश गरेका बन्दसूचीमा समावेश उम्मेदवारले आयोगबाट स्वीकृत कार्यक्रम बमोजिम उम्मेदवारी फिर्ता लिन पाउने व्यवस्था गरिएको हो।

निर्वाचन आयोगले यसबारे सम्बन्धित सबै उम्मेदवारलाई जानकारी गराइसकेको निर्वाचन अधिकृत कृष्णबहादुर राउतले बताए। समानुपातिक निर्वाचन अधिकृतको कार्यालयमा आज बिहान १० बजेदेखि अपराह्न ४ बजेसम्म उम्मेदवारी फिर्ता लिन सकिनेछ।

बन्दसूचीमा नाम समावेश भएका उम्मेदवारले प्रतिनिधिसभा सदस्य समानुपातिक निर्वाचन निर्देशिका, २०८२ को अनुसूची–१८ बमोजिमको ढाँचामा निवेदन दिएर उम्मेदवारी फिर्ता लिन सक्नेछन्। कुनै कारणले उम्मेदवार स्वयं उपस्थित हुन नसकेमा वारेसमार्फत पनि निवेदन दिन सकिने आयोगले जनाएको छ।