के राति ८ बजेबाट सुरु होला त एमालेको मतदान ?

काठमाडौं । नेकपा एमालेको ११ औँ महाधिवेशनअन्तर्गत निर्वाचन प्रक्रिया अगाडि बढे पनि मतदान भने राति ८ बजेअघि सुरु हुन नसक्ने भएको छ। विद्युतीय मतदान उपकरणका सेवा प्रदायक रामलक्ष्मणका रामले नामावली सेट गर्न समय लाग्ने भएकाले ढिलाइ भएको बताएका छन्।

उपकरण व्यवस्थापक रामप्रसाद रिमालका अनुसार दिउँसो ३ बजे उम्मेदवारको संशोधित तथा अन्तिम नामावली प्राप्त भएको थियो महाधिवेशनका २२ सय ६३ प्रतिनिधिमध्ये एक पटकमा ८० जनाले मतदान गर्ने व्यवस्था मिलाइएको छ।

सबै प्रतिनिधिले मतदान गर्न २९–३० चरण लाग्ने अनुमान छ। एक जनालाई मतदान गर्न ३० देखि ३५ मिनेट समय लाग्ने भएकाले कुल प्रक्रिया १६–१७ घण्टा लाग्न सक्ने रिमालले बताए।

यदि मतदान राति ८ बजे सुरु भएमा नतिजा भोलि दिउँसो १२ देखि १ बजेसम्म आउने अनुमान गरिएको छ।