ध्वंश, आगजनी र विनाशकारी प्रवृत्तिको अन्त्य आवश्यक : ओली

काठमाडौं । नेकपा एमालेका अध्यक्ष केपी शर्मा ओलीले ध्वंश, आगजनी र विनाशकारी प्रवृत्तिको अन्त्य आवश्यक रहेको बताएका छन् ।

पृथ्वी जयन्ती तथा राष्ट्रिय एकता दिवसका अवसरमा सामाजिक सञ्जाल फेसबुकमार्फत संक्षिप्त शुभकामना सन्देश दिँदै अध्यक्ष ओलीले रचना, निर्माण, विकास र संरक्षणको मनोबल बढाउनुपर्नेमा जोड दिएका छन् ।

उनले शुभकामना सन्देशमा भनेका छन्, ‘आज पृथ्वी जयन्ती तथा राष्ट्रिय एकता दिवस । ध्वंश, आगजनी र विनाशकारी प्रवृत्तिको अन्त्य गर्दै रचना, निर्माण, विकास र संरक्षणको मनोबल बढाऔँ । सबैलाई राष्ट्रिय एकता दिवसको शुभकामना ।’

अध्यक्ष ओलीले रचनात्मक सोच र विकासप्रति प्रतिबद्धताले नै राष्ट्रिय एकता दिवस मनाउनुको वास्तविक सार्थकता हुने उल्लेख गरेका छन् ।