कांग्रेस विशेष महाधिवेशन: उद्घाटनअघि काठमाडौँका ६ स्थानबाट जुलुस निस्कने, यस्तो छ रुट

काठमाडौं । नेपाली कांग्रेसको विशेष महाधिवेशन पक्षधरहरूले आज उद्घाटन सत्रअघि काठमाडौंमा भव्य जुलुस प्रदर्शन गर्ने तयारी गरेका छन् । विशेष महाधिवेशन आज मध्याह्न १२ बजे भृकुटीमण्डपमा उद्घाटन हुने तय भएको छ । उद्घाटन समारोह सुरु हुनुअघि विभिन्न स्थानबाट जुलुस निकालेर महाधिवेशनस्थलमा प्रवेश गराउने तयारी आयोजक समितिले गरेको छ ।

दोस्रो विशेष महाधिवेशन व्यवस्थापन सचिवालयका अनुसार ललितपुरको कुपण्डोल तथा काठमाडौंका सुन्धारा, रत्नपार्क, पद्मकन्या क्याम्पस चोक, शंकरदेव क्याम्पस, कमलपोखरीलगायतका स्थानबाट जुलुस निस्कनेछ । सबै रुटबाट बिहान ११ बजे जुलुस सुरु गरिने सचिवालयले जनाएको छ । जुलुस भृकुटीमण्डप प्रवेश गरेपछि औपचारिक उद्घाटन कार्यक्रम सुरु हुनेछ । आजै महाधिवेशनको बन्दसत्र पनि प्रारम्भ हुने र महाधिवेशन सोमबारसम्म सञ्चालन हुने जनाइएको छ ।

जुलुस निस्कने रुटहरू

रुट नम्बर १
जम्मा हुने स्थान : सुन्धारा
सुन्धारामा चितवन, अर्घाखाँची, नवलपुर तथा सुदूरपश्चिमका जिल्लाबाट आएका कांग्रेस नेता–कार्यकर्ता जम्मा हुनेछन् । काठमाडौं निर्वाचन क्षेत्र ८, ९ र १० का नेता–कार्यकर्ता पनि यही जुलुसमा सहभागी हुनेछन् ।
यो जुलुस सुन्धाराबाट वीर अस्पताल, रत्नपार्क हुँदै पुरानो बसपार्क भएर भृकुटीमण्डप प्रवेश गर्नेछ ।

रुट नम्बर २
जम्मा हुने स्थान : रत्नपार्क
रत्नपार्कबाट निस्कने जुलुसमा नुवाकोट, रसुवा, धादिङ तथा काठमाडौंको उत्तरी क्षेत्र र निर्वाचन क्षेत्र ५, ६ र ७ का नेता–कार्यकर्ता सहभागी हुनेछन् ।
यो जुलुस रत्नपार्कबाट पुरानो बसपार्क हुँदै विशेष महाधिवेशनस्थल पुग्नेछ ।

रुट नम्बर ३
जम्मा हुने स्थान : पद्मकन्या क्याम्पस
पद्मकन्या क्याम्पसबाट आउने जुलुसमा बाँके, बर्दिया, धनुषा, सप्तरी, सिरहा, महोत्तरी, सर्लाही, रौतहट, बारा र पर्साबाट आएका नेता–कार्यकर्ता सहभागी हुनेछन् । काठमाडौंका निर्वाचन क्षेत्र ५, ६ र ७ का नेता–कार्यकर्ता पनि यही जुलुसमा सहभागी हुनेछन् ।
यो जुलुस पद्मकन्या क्याम्पसबाट पुतलीसडक, शंकरदेव क्याम्पस, पद्मोदय मोड हुँदै भृकुटीमण्डप प्रवेश गर्नेछ ।

रुट नम्बर ४
जम्मा हुने स्थान : शंकरदेव क्याम्पस
भक्तपुर, काभ्रे, दोलखा, रामेछाप, सिन्धुपाल्चोक, सिन्धुली तथा काठमाडौं निर्वाचन क्षेत्र २ र ३ का नेता–कार्यकर्ता यस रुटको जुलुसमा सहभागी हुनेछन् ।
यो जुलुस शंकरदेव क्याम्पसबाट पुतलीसडक र पद्मोदय मोड हुँदै भृकुटीमण्डप प्रवेश गर्नेछ ।

रुट नम्बर ५
जम्मा हुने स्थान : कमलपोखरी
काठमाडौं निर्वाचन क्षेत्र १ र ४ का नेता–कार्यकर्ता कमलपोखरीमा जम्मा भई चारखाल अड्डा, डिल्लीबजार, पुतलीसडक, शंकरदेव क्याम्पस हुँदै भृकुटीमण्डप प्रवेश गर्नेछन् ।

रुट नम्बर ६
जम्मा हुने स्थान : कुपण्डोल
ललितपुरको कुपण्डोलबाट निस्कने जुलुसमा ललितपुर र मकवानपुरका नेता–कार्यकर्ता सहभागी हुनेछन् ।
यो जुलुस कुपण्डोल, थापाथली, त्रिपुरेश्वर, सुन्धारा, वीर अस्पताल, रत्नपार्क र पुरानो बसपार्क हुँदै भृकुटीमण्डप पुग्नेछ ।

आयोजक समितिका अनुसार जुलुसलाई अनुशासित र व्यवस्थित ढंगले सञ्चालन गर्दै महाधिवेशनलाई भव्य र सफल बनाउने तयारी गरिएको छ ।