कांग्रेसको विशेष महाधिवेशन आजदेखि

काठमाडौं । नेपाली कांग्रेसका महामन्त्रीद्वय गगन थापा र विश्वप्रकाश शर्माको पहलमा आयोजित विशेष महाधिवेशन आजदेखि काठमाडौँमा सुरु हुँदैछ । महाधिवेशनको उद्घाटन दिउँसो १ बजे भृकुटीमण्डपमा हुने तय भएको छ ।

भृकुटीमण्डपको खुला चौरमा करिब ५० जना अतिथि अटाउने गरी मञ्च निर्माण गरिएको छ भने महाधिवेशनस्थलमा छ हजारभन्दा बढी कुर्सीको व्यवस्था गरिएको छ ।

आज काठमाडौँ उपत्यकाका विभिन्न स्थानबाट आउने र्‍यालीलाई व्यवस्थित रूपमा कार्यक्रममा सहभागी गराउने तयारी गरिएको छ । विशेष महाधिवेशनको सभापतित्व कांग्रेस काठमाडौँका सभापति कृष्ण सबुज बानियाँले गर्नेछन् । आयोजकका अनुसार यस महाधिवेशनमा अन्य राजनीतिक दलका नेताहरूलाई आमन्त्रण गरिएको छैन ।

मुलुकभरबाट आउने अधिकांश महाधिवेशन प्रतिनिधि काठमाडौँ आइसकेका छन् भने केही आउने क्रम जारी छ । आवास तथा खाना व्यवस्थापन समितिका संयोजक रमेश धमलाका अनुसार काठमाडौँका विभिन्न स्थानमा तीन हजार ६ सय प्रतिनिधिका लागि आवासको व्यवस्था गरिएको छ । आवश्यक परे थप प्रतिनिधिका लागि पनि तत्काल व्यवस्थापन गर्न सकिने व्यवस्था गरिएको उनले बताए ।

उद्घाटनपछि बन्दसत्र भृकुटीमण्डपकै सभाहलमा सञ्चालन हुनेछ । बन्दसत्रमा पार्टी नेतृत्व परिवर्तनको विषय प्रमुख रूपमा उठ्ने सम्भावना देखिएको छ । देशभरबाट आएका बहुसंख्यक प्रतिनिधिले नेतृत्व परिवर्तनको मुद्दा उठाए पनि तत्काल नेतृत्व परिवर्तनले पार्टी विभाजनको जोखिम बढ्ने भन्दै महामन्त्रीद्वय संकल्प प्रस्तावमार्फत महाधिवेशन टुंग्याउने रणनीतिमा देखिएका छन् । विशेष महाधिवेशन संस्थापन पक्षका लागि दबाबको विषय बन्ने संकेत देखिएको छ ।