आज पृथ्वी जयन्ती तथा राष्ट्रिय एकता दिवस मनाइँदै

काठमाडौं । राष्ट्रनिर्माता पृथ्वीनारायण शाहको ३०४औँ जन्मजयन्ती तथा राष्ट्रिय एकता दिवस आज देशभर विभिन्न कार्यक्रम आयोजना गरी मनाइँदैछ ।

विसं १७७९ मा जन्मिएका शाहको योगदानको स्मरण गर्दै आज मुलुकका विभिन्न स्थानमा  विविध कार्यक्रम सञ्चालन भइरहेका छन् ।

पृथ्वी जयन्तीका अवसरमा राष्ट्रिय प्रजातन्त्र पार्टी (राप्रपा) ले चियापान समारोहको आयोजना गरेको छ । उक्त समारोहमा प्रधानमन्त्री, विभिन्न राजनीतिक दलका शीर्ष नेता, पूर्वप्रधानमन्त्री तथा विशिष्ट व्यक्तित्वलाई आमन्त्रण गरिएको छ ।

शाहको जन्मस्थान गोरखामा पनि प्रत्येक वर्षझैँ यस वर्ष विशेष कार्यक्रम गरी पृथ्वी जयन्ती मनाइँदैछ । यसै अवसरमा नेपाली सेनाले सैनिक मुख्यालय जङ्गीअड्डा परिसरमा रहेको राष्ट्रनिर्माताको पूर्णकदको सालिकमा माल्यार्पण गर्दै सम्मान प्रकट गर्ने परम्परालाई निरन्तरता दिएको छ ।

तत्कालीन गोरखाका राजा पृथ्वीनारायण शाहले विभिन्न सामाजिक, आर्थिक र भौगोलिक चुनौतीका बीच जनताको उत्साहजनक सहयोग र सहभागितामा छरिएर रहेका बाइसे–चौबीसे राज्यलाई एकीकरण गर्न सफल भएका थिए । २० वर्षको उमेरमा गद्दीआरोहण गरेका शाहले आन्तरिक तथा बाह्य शक्तिलाई पराजित गर्दै एकीकरण अभियान अघि बढाएका थिए । विसं १८३१ मा ५२ वर्षको उमेरमा उनको निधन भएको थियो ।