चुनावपछि कानून व्यवसायमै फर्किन्छु : गृहमन्त्री अर्याल

काठमाडौं । गृहमन्त्री ओमप्रकाश अर्यालले आगामी प्रतिनिधि सभा निर्वाचनपछि पुनः कानून व्यवसायमा फर्किने बताएका छन्।

बिहीबार काठमाडौँमा आयोजित एक कार्यक्रममा बोल्दै गृहमन्त्री अर्यालले हालको जिम्मेवारी पूरा भएपछि आफू पुरानै पेशामा फर्किने स्पष्ट पारे।

मानव अधिकारकर्मी तथा कानून व्यवसायीको सहभागिता रहेको कार्यक्रममा उनले भने, “म यहीँ फिल्डबाट गएको मान्छे हुँ, यहीँ नै फर्किने भनेको छु। म तपाईंहरूकै बीचमा छु।”

हाल सरकारको प्राथमिकता आगामी प्रतिनिधि सभा निर्वाचन भएको उल्लेख गर्दै उनले त्यसलाई सफल बनाउन सक्दो प्रयास गरिरहेको बताए। आफू कुनै पक्ष वा विपक्षमा नरहेको स्पष्ट पार्दै उनले कानून व्यवसायी र अधिकारकर्मीलाई सहयोग गर्न आग्रह गरे।

“अब धेरै समय छैन, करिब दुई महिना मात्र बाँकी छ,” भन्दै उनले थपे, “त्यसपछि हामी फेरि सँगै हुनेछौँ।”