विशेष महाधिवेशनविरुद्ध कांग्रेस संस्थापनको काउन्टर रणनीति

काठमाडौं । नेपाली कांग्रेसको संस्थापन पक्षले प्रस्तावित विशेष महाधिवेशनलाई लक्षित गर्दै छुट्टै काउन्टर रणनीति अघि सारेको छ। संस्थापन पक्षले पुस २७ गते युवा भेला र पुस २८ गते जिल्ला सभापतिहरूको भेला आयोजना गर्ने तयारी गरेको हो।

कांग्रेस सभापति शेरबहादुर देउवाको निवास महाराजगञ्जमा बिहीबार बिहान भएको छलफलपछि महामन्त्री गगन थापा र विश्वप्रकाश शर्माले विशेष महाधिवेशन आह्वान गरेकै मितिमा यी भेला गर्न लागिएको हो।

कांग्रेस केन्द्रीय सदस्य जीतजंग बस्नेतका अनुसार पुस २७ गते युवा र पुस २८ गते जिल्ला सभापतिहरूको भेला पार्टी कार्यालय सानेपामा आयोजना गरिनेछ। 

उनका अनुसार युवा भेलाको संयोजन तरुण दलका अध्यक्ष विद्वान गुरुङले गर्नेछन् भने जिल्ला सभापतिहरूको भेलाको नेतृत्व भक्तपुर कांग्रेसका सभापति दुर्लभ थापाले गर्नेछन्।

यसअघि पार्टीले आगामी वैशाख २८ देखि ३१ गतेसम्म १५ औँ महाधिवेशन गर्ने निर्णय गरेपछि महामन्त्रीद्वय थापा र शर्माले पुस २७ र २८ गते काठमाडौँको भृकुटीमण्डपमा विशेष महाधिवेशन आयोजना गर्ने घोषणा गरेका थिए।