प्रतिनिधिसभा निर्वाचनलाई लक्षित गर्दै १ लाख ३३ हजार ९८० म्यादी प्रहरीका लागि भर्ना खुल्यो

काठमाडौं । सरकारले आगामी फागुन २१ गते हुने प्रतिनिधि सभा निर्वाचनलाई लक्षित गर्दै म्यादी प्रहरी भर्ना प्रक्रिया अघि बढाएको छ। निर्वाचन सुरक्षाका लागि एक लाख ३३ हजार ९ सय ८० जना निर्वाचन प्रहरी खटाइने भएको हो।

नेपाल प्रहरी तथा सशस्त्र प्रहरी बल नेपाल कार्यविधि–२०८२ अनुसार भर्ना गर्न लागिएको नेपाल प्रहरीले जनाएको छ। म्यादी प्रहरीमा सहभागी हुन चाहने इच्छुक नेपाली नागरिकले माघ १० गतेभित्र आवेदन दिन सक्ने व्यवस्था गरिएको छ।

यस भर्नामा नेपाल प्रहरी, सशस्त्र प्रहरी बल तथा नेपाली सेनाबाट अवकाश प्राप्त व्यक्तिहरू पनि सहभागी हुन पाउनेछन्। त्यस्तै, २०८२ पुससम्म सेना, प्रहरी तथा सशस्त्र प्रहरीमा आवेदन दिएका व्यक्तिहरूलाई प्राथमिकतामा राखिनेछ।

यसअघि सम्पन्न निर्वाचनहरूमा म्यादी प्रहरीका रूपमा सेवा गरेका तथा विदेशी फौजमा काम गरिसकेका व्यक्तिहरूलाई समेत विशेष प्राथमिकता दिइने उल्लेख छ।

शारीरिक मापदण्डअनुसार पुरुष उम्मेदवारको उचाइ कम्तीमा ५ फिट र महिला उम्मेदवारको उचाइ कम्तीमा ४ फिट १० इन्च हुनुपर्नेछ। साथै, महिला उम्मेदवार गर्भवती नभएको हुनुपर्ने शर्त पनि राखिएको छ।

नेपाल प्रहरीका अनुसार माघ ९ गतेभित्र आवेदनकर्तामध्येबाट छनोट प्रक्रिया सम्पन्न गरिनेछ भने छनोट भएका म्यादी प्रहरीलाई माघ १५ गतेदेखि प्रशिक्षण प्रदान गरिनेछ।