राष्ट्रियसभा उम्मेदवार माथि आज उजुरी दिन सकिने

काठमाडौं । आगामी माघ ११ गते हुने राष्ट्रियसभा सदस्य निर्वाचनका लागि  उम्मेदवारी दिएकाहरुमाथि  आज उजुरी दिन सकिने भएको छ।

निर्वाचन आयोगका अनुसार उम्मेदवारी दर्ता भइसकेकाले आज उजुरी दर्ताको समय तोकिएको हो।

हिजो सातै प्रदेशका राजधानीमा रहेका निर्वाचन अधिकृतको कार्यालयमार्फत उम्मेदवारी दर्ता गरिएको थियो। ती उम्मेदवारीमाथि परेका उजुरी र मनोनयनपत्रको जाँचबुझ पुस २५ र २६ गते गरिने आयोगले जनाएको छ। जाँचबुझपछि योग्य उम्मेदवारको नामावली सार्वजनिक गरिनेछ।

निर्वाचन आयोगको कार्यतालिकाअनुसार पुस २७ गते उम्मेदवारले नाम फिर्ता लिन सक्नेछन् भने सोही दिन उम्मेदवारको अन्तिम नामावली प्रकाशन गरिनेछ। त्यसपछि पुस २८ गते उम्मेदवारलाई निर्वाचन चिह्न प्रदान गरिने आयोगका सहसचिव तथा प्रवक्ता नारायणप्रसाद भट्टराईले जानकारी दिए।

राष्ट्रियसभाका १८ सिटका लागि ४४ जनाले उम्मेदवारी दिएका छन्। ती सिटका लागि माघ ११ गते निर्वाचन हुने भएको छ।