नेपाललाई पनि अमेरिकाले भिसा बन्ड लागु हुने देशहरुको सूचीमा राख्यो, के हो भिसा बन्ड?

काठमाडौँ । अमेरिकाको विदेश मन्त्रालयले केही देशका नागरिकलाई पर्यटन र व्यवसाय भिसा लिँदा अनिवार्य रूपमा भिसा बन्ड राख्नुपर्ने व्यवस्था लागू गर्ने सूचीमा नेपाललाई पनि राखेको छ ।  

अब नेपालीले पर्यटन र व्यवसाय भिसामा अमेरिका जाँदा ५ देखि १५ हजार अमेरिकी डलर धरौटी राख्नुपर्ने छ ।

अमेरिकाको विदेश मन्त्रालयले केही देशका नागरिकलाई B1/B2 (पर्यटन/व्यवसाय) भिसा लिँदा अनिवार्य रूपमा भिसा बन्ड राख्नुपर्ने व्यवस्था लागू गर्ने सूची सार्वजनिक गरेको हो । यो कार्यक्रम अन्तर्गत नेपालसहित ४० भन्दा बढी देशका नागरिक प्रभावित हुनेछन् ।

नेपालका नागरिकका लागि सन् २०२६ जनवरी २१ देखि भिसा बन्ड व्यवस्था लागू हुनेछ ।

भिसा बन्ड के हो ?
अमेरिकाले भिसा ओभरस्टे (तोकेको समयभन्दा बढी बस्ने) दर उच्च रहेका देशका नागरिकका लागि यो व्यवस्था लागू गरेको हो ।  यदि कुनै आवेदक अन्य सबै हिसाबले B1/B2  भिसाका लागि योग्य ठहरिए पनि, ५ हजार, १० हजार वा १५ हजार अमेरिकी डलर बराबरको बन्ड राख्नुपर्नेछ। बन्डको रकम कति हुने भन्ने निर्णय भिसा अन्तर्वार्ताकै समयमा कन्सुलर अफिसरले गर्नेछन्।

प्रक्रिया कस्तो हुन्छ ?

• कन्सुलर अफिसरको निर्देशनपछि मात्र DHS Form I-352   बुझाउन पाइने
• भुक्तानी अमेरिकी सरकारको Pay.gov प्रणालीबाट मात्र गर्नुपर्ने
• तेस्रो पक्ष वेबसाइट प्रयोग गरेमा पैसा सुरक्षित नहुने चेतावनी
• बन्ड राख्दैमा भिसा पाइन्छ भन्ने ग्यारेन्टी नहुने
• निर्देशनबिनै पैसा तिरेमा फिर्ता नहुने

भिसा बन्ड राखेर अमेरिका जानेले तोकिने तीन विमानस्थल बाट मात्र अमेरिका प्रवेश र प्रस्थान गर्नुपर्नेछ :
Boston Logan International Airport (BOS)
John F. Kennedy International Airport (JFK)
Washington Dulles International Airport (IAD)


बन्ड कहिले फिर्ता हुन्छ ?
तलका अवस्थामध्ये कुनै एक पूरा भएमा बन्ड रकम स्वचालित रूपमा फिर्ता हुन्छः

• तोकिएको म्यादभित्र अमेरिका छाडेमा
• भिसाको म्याद सकिनुअघि अमेरिका नै नगएमा
• अमेरिकाको विमानस्थलमा प्रवेश अनुमति नपाएर फर्किनुपरेमा

तलका अवस्थामा बन्ड उल्लङ्घन मानिन्छ र रकम जफत हुन सक्छः

• तोकिएको समयभन्दा ढिलो अमेरिका छाडेमा
• अवैध रूपमा अमेरिका बसेमा
• गैरआप्रवासी भिसाबाट आश्रय (asylum) वा स्टाटस परिवर्तन का लागि आवेदन दिएमा

यो निर्णयसँगै अब नेपाली नागरिकका लागि  पर्यटन, पारिवारिक भेटघाट र छोटो व्यवसायिक यात्रामा जानेहरू प्रत्यक्ष प्रभावित हुनेछन् ।