नेकपाले छाडेन ४ सिटको अडान, तीन सिटमा सहमत नभए कांग्रेस–एमालेबीच मात्रै सिट बाँडफाँडको तयारी

काठमाडौं । आगामी माघ ११ गते राष्ट्रियसभाको रिक्त १८ सिटका लागि हुने निर्वाचनमा प्रमुख तीन दलबीच सिट बाँडफाँडमा अझै सहमति जुट्न सकेको छैन ।  नेपाली कम्युनिष्ट पार्टी नेकपाले चार सिटको अडान कायमै राख्दा नेपाली कांग्रेस र नेकपा एमालेसंग सहमति जुट्न नसकेको हो । 

आगामी माघ ११ गते हुने निर्वाचनको लागि आज उम्मेदवारको मनोनयन दर्ता हुँदैछ । तर, कांग्रेस, एमाले र नेपाली कम्युनिस्ट पार्टी (नेकपा) बीच अझैसम्म पनि सिट बाँडफाँडमा सहमति जुटिनसकेको नेताहरुले बताएका छन्। 

कांग्रेस र एमालेले आफ्नो मतभार भन्दा कम सिट दिने तयारी गरेकाले राष्ट्रिय सभा निर्वाचनमा कांग्रेस एमालेसँग गठबन्धन हुने सम्भावना कमजोर बन्दै गएको नेकपाका नेता हरिबोल गजुरेलले बताए । 

नेकपा गठबन्धनमा सहभागि नभए कांग्रेस र एमालेबीच मात्रै सिट बाँडफाँटको प्रयासमा दुई दलका नेता लागेका छन् । 
निर्वाचनका लागि आज बिहान १० बजेदेखि दिउँसो ३ बजेसम्म उम्मेदवारी दर्ताको समय छुट्याइएको छ । 

एमालेले राष्ट्रिय सभाका ६ जना उम्मेदवारसमेत छानिसकेको छ । तर, अन्य दलले भने अझै उम्मेदवार टुंग्याइसकेका छैनन्। 
निर्वाचन आयोगले राष्ट्रिय जनगणना, २०७८ अनुसार सार्वजनिक गरेको मतभारमा कांग्रेस सबैभन्दा अगाडि छ । उसको मतभार २१ हजारभन्दा बढी छ ।

त्यसैगरि एमालेको मतभार १७ हजारभन्दा बढी र नेकपाको १२ हजारभन्दा बढी मतभार छ ।