भेनेजुएलामाथि अमेरिकी आक्रमणको विरोधमा अस्ट्रेलिया र अर्जेन्टिनामा प्रदर्शन

भेनेजुएलामाथि हालै भएको अमेरिकी सैन्य आक्रमणको विरोधमा अस्ट्रेलिया र अर्जेन्टिनामा प्रदर्शन भएको छ ।
 
भेनेजुएलामाथि हालै भएको अमेरिकी सैन्य आक्रमणको विरोधमा अस्ट्रेलियाभर प्रदर्शन शुरु भएको छ । सिड्नी, मेलबर्न र क्यानबेरा जस्ता प्रमुख शहरहरूमा भेला भएका हजारौं प्रदर्शनकारीहरूले अमेरिकी सैन्य हस्तक्षेपको निन्दा गरेका छन् ।
 
उनीहरूले अमेरिकी कदमलाई अन्तर्राष्ट्रिय कानूनको उल्लंघन र एक सार्वभौम राष्ट्रमाथिको अनावश्यक हस्तक्षेप भएको बताएका छन् । अधिकारकर्मीहरूले यो आक्रमणले दक्षिण अमेरिकी क्षेत्रमा थप अस्थिरता र मानवीय संकट पैदा गर्ने चेतावनी दिएका छन् । 
यसैबीच, अस्ट्रेलियाली सरकारलाई पनि अमेरिकी सैन्य गतिविधिलाई समर्थन नगर्न र कुटनीतिक समाधानका लागि पहल गर्न प्रदर्शनकारीहरूले दबाब दिएका छन् । 

उता,  अर्जेन्टिनी प्रदर्शनकारीहरूले पनि भेनेजुएलामा भएको अमेरिकी सैन्य हस्तक्षेप र राष्ट्रपति मादुरोको गिरफ्तारीको विरोधमा प्रदर्शन गरेका छन् । 

ब्युनस आयर्सस्थित अमेरिकी दूतावास बाहिर आयोजित एक विरोध प्रदर्शनका क्रममा अर्जेन्टिनी नागरिकहरूले भेनेजुएलाप्रति ऐक्यवद्धता जनाएका छन् । 

प्रदर्शनकारीहरूले भेनेजुएलाका राष्ट्रपति निकोलस मादुरोलाई पक्राउ गर्न नेतृत्व गर्ने अमेरिकी सैन्य अभियानको निन्दा गरेका छन् ।