एमालेबाट लुम्बिनीमा रामकुमारी झाँक्री उम्मेदवार, अरु कोको बन्दैछन् उम्मेदवार ?

काठमाडौं । नेकपा एमालेले मधेश प्रदेशमा बाहेक राष्ट्रिय सभामा उम्मेदवार टुंगो लगाएको छ । 

एमालेले लुम्बिनीमा रामकुमारी झाँक्रीलाई उम्मेदवार बनाउने भएको छ । झाँक्री एकीकृत समाजवादीबाट माओवादीसँगको एकता प्रक्रियामा समाहित नभइ एमालेमा फर्किएकी थिइन् । २०७९ सालमा प्रतिनिधिसभा सदस्य बनेकी झाँक्री गत महाधिवेशनबाट एमालेको केन्द्रीय सदस्य निर्वाचित भएकी हुन् । 

त्यस्तै एमालेले कोशी प्रदेशमा रोशनी मेचेलाई उम्मेदवार बनाउने भएको छ । मेचे यसअघि एमाले अध्यक्ष केपी शर्मा ओली प्रधानमन्त्री हुँदा उनको सचिवालयमा थिइन् ।

बागमतीमा डा प्रेम दंगाल उम्मेदवार बन्ने भएका हुन् । २०४८ साल यता एमालेमा निरन्तर क्रियाशील दंगाल किसान महासंघका अध्यक्ष समेत भइसकेका छन् । 

एमालेले गण्डकीमा सम्झना देवकोटालाई उम्मेदवार बनाउने भएको छ । देवकोटा केन्द्रीय पार्टी संगठन विभागको सचिव पनि रहिसकेकी छन् । उनी स्थानीय तह निर्वाचनमा गोरखाको उपमेयरमा पराजित भएकी थिइन् ।

त्यस्तै एमालेले कर्णालीमा मीना रखाल र सुदूरपश्चिममा लीला भण्डारीलाई उम्मेदवार बनाउन लागेको हो ।

एमाले केन्द्रीय सदस्य रखाल २०७४ सालमा कर्णाली प्रदेश सभा सदस्य थिइन् । सुदूरपश्चिमबाट उम्मेदवार बन्न लागेकी लीला भण्डारी पूर्व माओवादी पृष्ठभूमिकी हुन् ।

मधेश प्रदेशमा भने उम्मेदवारको नाम टुंगिन बाँकी रहेको छ ।