धार्मिक विवाद बढ्दै गएपछि वीरगञ्जमा निषेधाज्ञा

वीरगञ्ज । टिकटक भिडियोलाई लिएर धनुषाबाट सुरु भएको धार्मिक विवादले आज पनि वीरगञ्ज तनावग्रस्त बनेपछि जिल्ला प्रशासन कार्यालयले निषेधाज्ञा जारी गरेको छ ।

जिल्ला सुरक्षा समितिको निर्णय अनुसार, आज दिउँसो एकबजे देखि अर्को सुचना जारी नभएसम्मका लागि निषेधाज्ञा जारी गरेको हो ।

पूर्वमा बसपार्क, पश्चिममा सिर्सिया पुल, उत्तरमा पावर हाउस चोक र दक्षिणमा शंकराचार्य गेट क्षेत्रमा कुनै किसिमको सभा, जुलुस, भेला र प्रदर्शन गर्न नपाउने गरि निषेधाज्ञा जारी गरिएको हो ।

वीरगञ्ज नगरपालिका क्षेत्रमा आज बिहानैदेखि विभिन्न हिन्दुवादी संगठनहरुले विरोध प्रदर्शन गर्दा स्थिती तनावग्रस्त बनेको थियो । 
धनुषामा भएको मस्जिद तोडफोडको घटनालाई लिएर आईतबार मुस्लिम समुदायले प्रदर्शन गरेका थिए ।



पर्सा प्रहरीका अनुसार अहिले मुस्लिम समुदाय र हिन्दु समुदाय दुवैले वीरगञ्जमा एक अर्काविरुद्ध प्रदर्शन गरिरहेका छन्।  अहिले त्यस क्षेत्रको सुरक्षा व्यवस्था कडा पारिएको छ ।