३ डिग्री सेल्सियसमा झर्‍यो काठमाडौँको न्यूनतम तापक्रम

काठमाडौं । काठमाडौं उपत्यकामा आज बिहान यस बर्षकै कम तापक्रम मापन गरिएको छ । 

जल तथा मौसम विज्ञान विभागको विभागको अद्यावधिक विवरणअनुसार आज बिहान ५‍.४५ बजे कीर्तिपुरको तापक्रम २.९ डिग्री सेल्सियस मापन भएको छ ।  त्यस्तै त्रिभुवन विमानस्थलको तापक्रम ३.७ डिग्री सेल्सियस, ललितपुर हात्तीबनको २.८, भक्तपुर नगरकोटको तापक्रम २.८ मापन भएको छ ।

काठमाण्डौको यो तापक्रम यस वर्षको हिउँद शुरू भएयताकै सबैभन्दा कम हो ।

उता, तराईका धेरैजसो ठाउँमा आज पनि बिहान बाक्लो हुस्सु र कुहिरो लागेको छ । आज बिहान नेपालगञ्जमा सबैभन्दा बाक्लो हुस्सु लागेको महाशाखाले जनाएको छ । आज बिहान नेपालगञ्जको भिजिबिलिटी ५० मिटर मात्र रहेको छ ।

त्यसैगरी भैरहवामा भिजिबिलिटी १ सय मिटर मापन गरिएको छ । 

मौसम पूर्वानुमान महाशाखाका अनुसार देशका उच्च पहाडी तथा हिमाली क्षेत्रमा हिमपात भएको छ । आज पनि एक–दुई ठाउँमा हल्का वर्षा र हिमपातको सम्भावना रहेको महाशाखाले जनाएको छ ।