रोल्पामा विद्यार्थी बोकेको जीप दुर्घटना, २ जनाको मृत्यु, ९ घाइते

रोल्पा । रोल्पामा जीप दुर्घटना हुँदा दुई विद्यार्थीको मृत्यु भएको छ । दुर्घटनामा ९ जना घाइते भएका छन् । 

सुनछहरी गाउँपालिका गाम खोलाको सेरमबाट नेपाल राष्ट्रिय माध्यमिक विद्यालयका विद्यार्थी बोकेरस्युरीतर्फ जाँदै गरेको ग १ ज ६६६६ नम्बरको बोलेरो जीप अनियन्त्रित भई दुर्घटना भएको प्रहरीले जनाएको छ । 

दुर्घटनामा सुनछहरी गाउँपालिका वडा नम्बर ४ स्युरीका १२ वर्षीया दीपा पुन र १२ वर्षकै सुनिल विकको मृत्यु भएको हो । मृतक दुवैजना राष्ट्रिय माध्यमिक विद्यालयका विद्यार्थी हुन् । 

त्यस्तै घाइते हुनेमा  सुनछहरी गाउँपालिका वडा नम्बर ४ सिउरी का १५ वर्षीय हिमाल विक,  १२ वर्षीया अमृता पुन, १४ वर्षीया जमुना विक, २४ वर्षीया अस्मिता विक, १६ वर्षीया पवित्रा पुन, १७ वर्षीय शनि विक, १२ वर्षीया विपना घर्ती मगर, १५ वर्षीय  किसन घर्ती मगर र १५ वर्षीया हस्तिरा विक रहेको प्रहरीले जनाएको छ ।  

घाइते ९ जनालाई रोल्पामा प्राथमिक उपचारपछि थप उपचारका लागि बुटवलको लुम्बिनी सिटी अस्पताल रिफर गरिएको छ ।