नेपाल लिडका सञ्चारकर्मीमाथि ब्रिटिस कलेजका सुरक्षाकर्मीले गरेको दुर्व्यवहारप्रति पत्रकार महासंघको आपत्ति

काठमाडौं । नेपाल पत्रकार महासंघले नेपाल लिडका सञ्चारकर्मी समीर जोशी र अमृत भट्टमाथि ब्रिटिस कलेजका सुरक्षाकर्मीले गरेको दुव्र्यवहारप्रति आपत्ति जनाएको छ । 

महासंघले आज एक विज्ञप्ती जारी गर्दै पेशागत धर्म निर्वाह गर्न पुगेका पत्रकारलाई सघाउनुको साटो कलेज प्रशासनको आदेशमा भएको व्यवहार निन्दनीय र प्रेस विरोधी रहेको उल्लेख गरेको छ । महासंघ आगामी दिनमा यस किसिमको व्यवहार नदोहो¥याउन र प्रेस स्वतन्त्रताको सम्मान गर्न सम्बद्ध पक्षको ध्यानाकर्षण गराउँदछ, विज्ञप्तीमा भनिएको छ ।
 
नेपाल लिडका सञ्चारकर्मी जोशी र भट्ट ब्रिटिस कलेजसँग जोडिएको पछिल्लो विवादको सत्य–तथ्य बुझ्न रिपोर्टिङमा पुगेका बेला कलेज प्रशासनको निर्देशनमा त्यहाँका सुरक्षाकर्मीले उनीहरूमाथि दुव्र्यवहार गर्दै डेढ घण्टासम्म बन्धक बनाएका थिए  ।

विद्यार्थी र अभिभावकबाट ठगी, शैक्षिक प्रमाणपत्र, भिसा प्रक्रिया र कलेजको वैधानिकतासम्बन्धी उजुरीहरू बढ्दै गएपछि ती विषयमा सत्यतथ्य बुझ्न पुगेका पत्रकारलाई कलेज प्रशासनले कार्यालयभित्रै थुनेका हुन् । रिपोर्टिङ गर्न नदिन मोबाइल खोस्ने, भिडियो खिच्न रोक लगाउने र बाहिर ननिस्कन धम्की दिने जस्ता क्रियाकलाप गरिएको थियो ।