नेपाली कांग्रेसलाई प्रश्न: हल बुकिङ पहिले महाधिवेशन चाँही कहिले ?

काठमाडौं । विशेष महाधिवेशन गर्न भन्दै कांग्रेसका महामन्त्रीद्धय गगन थापा विश्वप्रकाश शर्माले भृकुटीमण्डपमा हल बुकिङ गरेका छन् । 

नियमित महाधिवेशनको सम्भावना सकिएकोपछि पार्टी स्वतः विशेष महाधिवेशनतिर अघि बढेको भन्दै हल बुकिङ गरिएको केन्द्रीय सदस्य प्रतिमा गौतमले बताएकी छिन् । 

उनका अनुसार पुस २७ र २८ गतेका लागि भृकुटीमण्डपको हल बुकिङ गरिएको हो । 

नियमित महाधिवेशनको मिति तोकिए पनि नहुने पक्का भइसकेपछि पार्टी स्वतः विशेष महाधिवेशनतिर अघि बढेको उनले बताइन् । विशेष महाधिवेशनको तयारीबारे महामन्त्री गगन थापा र विश्वप्रकाश शर्माले सभापतिलाई जानकारी गराउने गौतमको भनाई छ । 

कांग्रेसका ५४ प्रतिशत महाधिवेशन प्रतिनिधिले असोज २९ गते विशेष महाधिवेशन माग्दै हस्ताक्षर बुझाएका थिए । विशेष महाधिवेशन माग भएको तीन महिनाभित्र बोलाउनुपर्ने बाध्यकारी विधान अनुसार नै महामन्त्रीद्वय अघि बढेको बताइएको छ । तर संस्थापन पक्ष भने नियमित कार्यतालिका नै परिवर्तन गरेर चुनावपछि मात्रै महाधिवेशन गर्ने पक्षमा छ ।