सोसल मिडियाबाट हो-हल्ला गर्नेलाई जनताका मुक्तिदाता ठान्ने भ्रम फैलाउन खोजिएको प्रचण्डको आरोप

काठमाडौं ।  नेपाली कम्युनिष्ट पार्टीका संयोजक पुष्पकमल दाहाल ‘प्रचण्ड’ ले सामाजिक सञ्जालमा फैलिएको भ्रमप्रति असन्तुष्टि व्यक्त गर्दै सहर बजारका केही व्यक्तिहरूले आफूहरूलाई जनताका मुक्तिदाता झैँ प्रस्तुत गर्ने प्रयास गरेको बताएका छन्।

केशव रावलको रुकुमपूर्वदेखि काठमाडौंसम्मको सम्मानसहितको पदयात्रा समापन कार्यक्रममा बोल्दै प्रचण्डले दशकौंको संघर्ष र तपस्याबाट बनेका विचार र सिद्धान्तलाई बेवास्ता गरी दलहरू समाप्त भइसकेको भनी भ्रामक प्रचार गरिएको आरोप लगाए।

‘सोसल मिडियामा हेर्दा लाग्छ कि इतिहासविहीन, विचारविहीन र निष्ठाविहीनहरूले नेपाल कब्जा गरिसके,’ प्रचण्डले भने, ‘बजार र मोबाइल हेर्नेले त्यस्ता मानिसहरूलाई नै मुक्तिदाता ठानेको छ।’

उनले पार्टीलाई अझ बलियो बनाउने, राष्ट्रिय एकता सुदृढ गर्ने, शान्ति, समृद्धि र समाजवादको यात्रामा अगाडि बढ्न सबैले एकजुट हुनुपर्ने बताए।

प्रचण्डले केशव रावलको पदयात्रालाई सकारात्मक रुपमा लिँदै पार्टी एकताको पक्षमा सन्देश प्रवाह भएको उल्लेख गरे।