आज समानुपातिकको बन्द सूची बुझाउने अन्तिम दिन

काठमाण्डौ । फागुन २१ गते तोकिएको प्रतिनिधि सभाको निर्वाचनका लागि समानुपातिक प्रणालीतर्फको उम्मेदवारको बन्द सूची पेश गर्ने आज अन्तिम दिन रहेको छ  । 

निर्वाचन आयोगको कार्यतालिकाअनुसार राजनीतिक दलहरुले आजसम्म आयोगमा बन्द सूची दर्ता गराइसक्नुपर्नेछ ।  

हिजो तीन वटा साना दलका एक  सय ३४ जनाले सबै प्रक्रिया पूरा गरेर बन्द सूची पेश गरिसकेका छन् । नेपाल मजदुर किसान पार्टी, जनप्रिय लोकतान्त्रिक पार्टी, श्रम संस्कृति पार्टीलगायतले हिजो नै बन्द सूची पेश गरेका आयोगले जनाएको छ ।

मुख्य दलहरु नेपाली कांग्रेस, नेकपा एमाले, नेपाली कम्युनिष्ट पार्टी, रास्वपा, राप्रपा लगायतका दलहरु बन्द सूचीलाई अन्तिम रुप दिएर आज आयोगमा बुझाउने तयारीमा छन् । 

भोलिदेखि २० गतेसम्म बन्द सूचीको प्रारम्भिक परीक्षण हुनेछ । त्यसपछि देखिएका कमजोरी सच्याउन पुस २१ देखि २७ गतेसम्म दलहरुलाई समय दिइनेछ । सच्याइएका बन्द सूची पुस २८ देखि माघ ३ गतेसम्म पुनः परीक्षण गरिने आयोगले जनाएको छ ।

आयोगले माघ ४ गते बन्द सूची सार्वजनिक गर्ने तयारी गरेको छ भने माघ २० गते अन्तिम सूची प्रकाशन हुनेछ ।