२० प्रहरी कर्मचारी आफूखुशी गैरहाजिर, ७ दिनभित्र हाजिर हुन निर्देशन

काठमाडौं । नेपाल प्रहरीका जना प्रहरी कर्मचारी दुई महिनादेखि गैरहाजिर छन् ।
 
प्रहरी प्रधान कार्यालयले शुक्रबार सूचना जारी गर्दै एक प्रहरी सहायक निरीक्षक (असई), तीन जना सहायक हबलदारसहित आफूखुशी गैरहाजिर रहेका २० जनालाई तत्काल सम्पर्कमा आउन आग्रह गरेको छ । 

उनीहरूको खोजतलास गर्दा गराउँदा तथा प्रहरी नियमावलीबमोजिम प्रक्रिया पूरा गरी सूचना टाँस भइसक्दा पनि सम्पर्कमा नआएको प्रहरी प्रधान कार्यालयले जनाएको छ ।

लामो सयमदेखि सम्पर्कविहीन भएका प्रहरीलाई एक साताभित्र सम्पर्कमा नआए सेवाबाट हटाइने चेतावनीसमेत दिइएको छ । आफू गैरहाजिर रहनुको कारण खोली सन्तोषजनक  स्पष्टीकरण जवाफसहित सात दिनभित्र उपस्थित नभए ती प्रहरी कर्मचारीहरूलाई प्रहरी नियमावालीको नियम १०९ को देहाय (ख) १ बमोजिम सेवाबाट हटाउने प्रहरी प्रधान कार्यालयले जनाएको छ ।