रवि-बालेन-कुलमान : आ-आफ्नै 'एक्सरसाइज'मा

बालेन शाहले नयाँ दलका लागि एक्सरसाइज थालेपछि रास्वपा सभापति रवि लामिछाने छलफलमा जुटेका छन् । तर, छलफलले ठोसरुप लिन सकेको छैन । कुरा मिल्न नसकेको बालेन पक्षले बताएको छ । तर, रवि पक्षले कुरा मिल्ने आशा राखेको छ । रवि बालेनलाई भेट्न कुपण्डोलस्थित कुमार बेनका घरमा पुगेका थिए । एक्ला–एक्लै भेटेका रवि र बालेनबीच सहकार्यका लागि थप छलफल भएको बुझिएको छ ।
पुराना दल संसद पुनर्स्थापनाका लागि सक्रिय बन्दा नयाँ शक्तिका रुपमा उदायका रवि–बालेन–कुलमानहरु निरन्तर छलफलमा जुटेका हुन् । बुधबार रातिमात्र बालेनले सर्वपक्षीय छलफल गरेका थिए । उनले जेनजी अभियन्ता सुदन गुरुङ, रक्षा बमसहितका नागरिक अगुवाहरुसँग पनि छलफल गरेका थिए ।
मुटुरोग विशेषज्ञ भगवान कोइराला, पत्रकार ऋषि धमाला, सुरजसिंह ठकुरी, कांग्रेस नेता चन्द्र भण्डारी लगायतसँग गएराति छलफल गरेका बालेनले बिहीबार विहान पुनः छलफललाई निरन्तरता दिए । उनले कांग्रेस नेता सुनिल शर्मासँग पनि छलफल गरेका छन् । शर्माले आफूले संसद पुनस्र्थापना गरेर संविधान संशोधन गर्दै प्रत्यक्ष कार्यकारीको मोडेलमा जानुपर्ने प्रस्ताव गरेको नेपाल लिडलाई बताए । जवाफमा बालेनले अहिले संसद पुनस्र्थापना नभएर चुनावमै जानुपर्नेमा जोड दिएका थिए ।
बालेनले देश विकास पार्टीलाई अघि बढाउने तयारी गरेपछि रास्वपा सभापति लामिछाने बालेनलाई भेट्न कुपण्डोल पुगेका थिए । भेटमा आगामी निर्वाचनमा सँगै जाने र प्रधानमन्त्री बन्न रविले बालेनलाई प्रस्ताव गरेका थिए । तर, बालेन आफ्नै दल अघि बढाउने ‘मुड’मा छन् ।  त्यस्तै बालेनले बिहीबार विहान नै उज्यालो नेपाल पार्टीका संरक्षक कुलमान घिसिङसँग पनि छलफल गरे । उनीहरुबीच केही समझदारी बन्नेढंगले कुरा अघि बढेको नेताहरुले बताएका छन् । कुलमान पक्षले सुदन गुरुङ समूह सामेल गर्न चाहेको छैन । तर, बालेन सुदनलाई अघि बढाउन चाहन्छन् । त्यस्तै सुमना श्रेष्ठ केहीदिनमै कुलमानको दलमा प्रवेश गर्ने तयारीमा जुटेकी छन् । छलफलहरुलाई निरन्तरता दिंदै आ–आफ्नो हिसाबमाथि पार्ने दाउमा देखिएका छन् ।