जाँचबुझ आयोगमा बयान दिन जालान् त ओली, अब दुई दिनमै पाइन्छ राहादानी !

न्यूज बजमा आज

रमेश लेखकको बयानपछि ओलीको पालो 
जेन–जी आन्दोलनको जाँचबुझ गर्न गठित आयोगले तत्कालीन गृहमन्त्री रमेश लेखकको बयान सकिएलगत्तै एमाले अध्यक्ष केपी ओलीलाई पत्र लेख्ने भएको छ । आयोगले लेखकलाई पत्र पठाईसकेको छ, उनको बयान सकिए लगत्तै तत्कालीन प्रधानमन्त्री ओलीलाई बयानका लागि आउन पत्र लेखिने प्रवक्ता विज्ञानराज शर्माले बताएका छन् ।  तत्कालीन गृहमन्त्री लेखक बयानमा जाने कि नजाने भन्ने विषयमा परामर्श गरिरहेका छन् । तत्कालीन प्रधानमन्त्री ओलीले भने आयोगको हैसियतमाथि नै प्रश्न उठाउँदै बयान दिन नजाने बताउदै आएका छन् । ०००

प्रतिनिधिसभा पुनर्स्थापनाको पूरक रिटमा आज पेशी 
प्रतिनिधिसभाको पुनस्र्थापना माग गर्दै ६८ सांसदले दायर गरेको पूरक रिटमा आज पेशी तोकिएको छ । नेपाली कांग्रेसका ६५ र अन्य दलका तीनसहित ६८ सांसदले पूरक रिट दायर गरेका हुन् । पूर्वसांसदहरूले पूर्वमहान्यायाधिवक्ता खम्मबहादुर खातीलाई हस्ताक्षरसहितको वारेसमार्फत मङ्गलबार सर्वोच्च अदालतमा पूरक रिट दर्ता भएको थियो । यसअघि कांग्रेसका ८ सांसदहरुले मङ्सिर २३ गते रिट दर्ता गरेका थिए भने थप ६० सांसद पनि प्रतिनिधि सभा पुनःस्थापना माग्दै सर्वोच्च पुगेका हुन् ।  कांग्रेसबाहेक अशोक राई नेतृत्वको जनता समाजवादी पार्टी, जनमत पार्टी र एक स्वतन्त्र सांसदले पनि हस्ताक्षर गरेका हुन् । यसअघि नै नेकपा एमालेका ७५ सांसदहरूले प्रतिनिधिसभा पुनःस्थापना माग्दै सर्वोच्चमा हस्ताक्षर बुझाइसकेका छन् । ०००

कांग्रेस केन्द्रीय कार्यसम्पादन समितिको बैठक
काठमाडौँ । नेपाली कांग्रेस केन्द्रीय कार्यसम्पादन समितिको बैठक जारी छ । पार्टीको केन्द्रीय कार्यालय सानेपामा जारी बैठकमा पार्टीकोे १५औँ महाधिवेशन, राष्ट्रियसभाको निर्वाचन, फागुन २१ गते हुने प्रतिनिधिसभा निर्वाचनलगायत समसामयिक विषयमा छलफल हुने बताइएको छ । ०००

पार्टी कार्यालय अनुगमनमा व्यस्त सरकारी टोली 
सरकारले गठन गरेको उच्च स्तरीय राजनीतिक वार्ता समिति आज पनि राजनीतिक दलको पार्टी कार्यालयहरु निरिक्षणमा व्यस्त छ । उद्योग, वाणिज्य तथा आपूर्ति मन्त्री सुनिल कुमार सिन्हा, सञ्चार तथा सूचना प्रविधि मन्त्री जगदिश खरेल र प्रधानमन्त्रीको प्रमुख राजनीतिक सल्लाहकार अजयभद्र खनालको टिमले जनमत पार्टी कार्यालयको अनुगमन र निरीक्षणका साथै पार्टी अध्यक्ष सिके राउतसंग छलफल समेत गरेको  छ । यस्तै टोली आज राष्ट्रिय स्वतन्त्र पार्टी (रास्वपा) र राष्ट्रिय प्रजातन्त्र पार्टी (राप्रपा) को कार्यालय समेत पुगेको छ । ०००

अब दुई दिनभित्रै राहदानी 
राहदानी विभागले अब २ दिनभित्रै राहदानी उपलब्ध गराउने भएको छ । कूल ३ लाख ९६ हजार थान राहदानी छपाइ भएर आपूर्ति भइसकेको र आवश्यक भएकालाई तत्कालै उपलब्ध गराइने विभागले जनाएको छ । विभागका अनुसार जिल्ला, इलाका प्रशासन कार्यालय तथा विदेशमा रहेको नेपाली नियोगबाट आवेदन दिएकालाई राहदानी उपलब्ध गराइने छ । गत मङ्सिर १५ गतेसम्म आवेदन दिएकालाई यही पुस १५ गतेसम्म नयाँ राहदानी उपलब्ध गराइनेछ भने त्यसपछि आवेदन दिएकालाई क्रमशः उपलब्ध हुने विभागले जनाएको छ । ०००

धुलिखेल–खावा सडकको काम धमाधम
काठमाडौं । लामो समयदेखि प्रयोगकर्ताले सास्ती पाउँदै आएको अरनिको राजमार्ग अन्तर्गत धुलिखेल–खावा सडक खण्डको रोकिएको स्तरोन्नति पुनः सुरु भएको छ । नयाँ निर्माण कम्पनीसँग गत कात्तिकमा सम्झौता गरिएपछि पुनः स्तरोन्नतिको काम सुरु भएको हो । १४ महिनाको ठेक्का समय रहेकोमा समय भन्दा अघि नै कालोपत्रे गरेर सक्ने लक्ष्य निर्माण कम्पनीले लिएको छ । ०००

उज्यालो नेपाल पार्टी कार्यालयको नाम ‘उज्यालो घर’
उज्यालो नेपाल पार्टीको त्रिपुरेश्वरमा अवस्थित केन्द्रीय कार्यलय बिहीबार दिउँसो उद्घाटन गरिने भएको छ । ऊर्जामन्त्री कुलमान घिसिङको प्रमुख आतिथ्यतामा त्रिपुरेश्वरस्थित केन्द्रीय कार्यालयको औपचारिक उद्घाटन गर्ने भएको हो । पार्टीले कार्यालयको नाम ‘उज्यालो घर’ राखेको छ । यस्तै उज्यालो नेपाल पार्टीले जनमत पार्टीले उपाध्यक्ष पदबाट कारबाही गरेपछि दीपककुमार साहले गठन गरेको जनस्वराज पार्टीसँग आज चुनावी एकता गर्दैछ । ०००

सुन र चाँदीको भाउमा दिनदिनै नयाँ रेकर्ड
केही दिनदेखि सुन र चाँदीको भाउले लगातार नयाँ रेकर्ड बनाइरहेको छ । आज सुनको मूल्य तोलामा ९ सय रुपैयाँ बढेर २ लाख ६८ हजार १ सय पुगेको छ । हिजो सुनको मुल्य  ५ हजार ५ सय रुपैयाँ बढेको थियो । त्यस्तै चाँदीको भाउ प्रतितोला १६५ रुपैयाँ बढेर प्रतितोला ४ हजार ४२० रुपैयाँ पुगेको छ नेपाल सुनचाँदी व्यवसायी महासंघका अनुसार सुन र चाँदीको आजको मुल्य अहिले सम्मकै उच्च हो । ०००

१६ दिनका लागि २५ अर्ब निक्षेप खिच्दै राष्ट्र बैंक
काठमाडौं । नेपाल राष्ट्र बैंकले आज २५ अर्ब निक्षेप खिच्दैछ । अधिक तरलता कायमै रहेपछि १६ दिनका लागि राष्ट्र बैंकले आज फेरि निक्षेप संकलन उपकरण बोलकबोल मार्फत निक्षेप खिच्न लागेको हो । अहिले कुल निक्षेप ७५ खर्ब भन्दा बढी पुगेको छ । केन्द्रिय बैंकले वित्तीय प्रणालीको अधिक तरलता र ब्याजदर व्यस्थापनका लागि निक्षेप संकलन उपकरण र स्थायी निक्षेप सुविधामार्फत तरलता खिच्दै आएको छ । ०००

टर्कीमा विमान दुर्घटना, लिबियाका सेना प्रमुखसहित ५ जनाको मृत्यू
टर्कीको राजधानी अंकारा नजिकै भएको विमान दुर्घटनामा परि लिबियाका सेना प्रमुख लेफ्टिनेन्ट जनरल मोहम्मद अलि अहमद अल–हद्दादसहित चार जना उच्च सैनिक अधिकारीहरूको मृत्यू भएको छ । फाल्कन ५० प्रकारको व्यावसायिक जेट विमान अंकाराको एसिनबोगा विमानस्थलबाट त्रिपोलीका लागि उडेको थियो । टर्कीका सुरक्षा फौजले अंकाराको हायमाना जिल्लास्थित केसिककावाक गाउँ नजिकै विमानको भग्नावशेष फेला पारेका थिए । प्रारम्भिक अनुसन्धानमा विद्युतीय खराबीका कारण दुर्घटना भएको देखिएको टर्की अधिकारीहरूले बताएका छन् । ०००