पाकिस्तानको बलुचिस्तानमा सुरक्षाकर्मी र पृथकतावादी समूहबीच झडप, कम्तिमा १२५ जनाको मृत्यु

पाकिस्तानको दक्षिणपश्चिमी बलुचिस्तान प्रान्तका विभिन्न सहरमा सरकारी सुरक्षा बल र पृथकतावादी समूहबीच भएको भिडन्तमा कम्तिमा १२५ जनाको मृत्यु भएको छ।

पाकिस्तानी सेनाले जारी गरेको विज्ञप्तिअनुसार सुरक्षा कारबाहीका क्रममा ९२ जना लडाकू मारिएका छन्। साथै, भिडन्तमा १५ जना सुरक्षाकर्मी र १८ जना सर्वसाधारणको पनि ज्यान गएको जनाइएको छ।इरान र अफगानिस्तानसँग सीमा जोडिएको बलुचिस्तान प्रान्तमा दशकौँदेखि पृथकतावादी विद्रोह जारी रहँदै आएको छ। शनिबार भएका आक्रमणको जिम्मेवारी प्रतिबन्धित पृथकतावादी समूह बलुच लिबरेसन आर्मी (बीएलए) ले लिएको छ।

बीएलएले प्रान्तभर एकैसाथ आक्रमण गरिएको र करिब १५ घण्टा चलेको कारबाहीमा ८४ जना पाकिस्तानी सुरक्षाकर्मी मारिएको दाबी गरेको छ।तर, पाकिस्तानी सेनाको सञ्चार शाखा आइएसपीआरले भारत प्रायोजित लडाकूहरूले आक्रमण गरेको दाबी गर्दै कुनै पनि सहर वा रणनीतिक स्थल नियन्त्रणमा लिन खोजिएको प्रयास असफल बनाइएको जनाएको छ।

पाकिस्तानको सबैभन्दा ठूलो तर आर्थिक रूपमा कमजोर प्रान्त बलुचिस्तानमा जातीय बलुच समूहद्वारा दशकौँदेखि विद्रोह हुँदै आएको छ। पाकिस्तानले यस हिंसामा विदेशी पक्षको समर्थन रहेको आरोप लगाउँदै आएको छ, जसलाई भारतले निरन्तर अस्वीकार गर्दै आएको छ।