आज एक महिना लामो स्वस्थानी व्रत कथा समापन गरिँदै

काठमाडौं । माघ शुक्ल पूर्णिमाका दिन आज एक महिना लामो स्वस्थानी व्रत कथा विधिपूर्वक समापन गरिँदैछ। पौष शुक्ल पूर्णिमादेखि सुरु भएको स्वस्थानी व्रतमा देशभरका भक्तजनले नित्य मध्याह्नकालमा पार्वतीसहित महादेवको पूजा गर्दै आएका थिए।

सोही दिनदेखि सुरु गरिएको स्कन्द पुराणअन्तर्गत केदार खण्डको माघ माहात्म्यमा आधारित कुमार र अगस्त्यबीचको संवादलाई स्वस्थानी कथाका रूपमा वाचन तथा श्रवण गर्ने परम्पराको पनि आज अन्त्य हुँदैछ।

नेपाल पञ्चाङ्ग निर्णायक विकास समितिका अनुसार आज मध्याह्नकालपछि विधिपूर्वक पूजा गरी व्रत समापन गरिनेछ। त्यसपछि राति जाग्राम बसेर बिहान फूलपाती नदीमा विसर्जन गरेसँगै यस वर्षको स्वस्थानी व्रत सम्पन्न हुने विधि छ।

यसैबीच, काठमाडौँ उपत्यकाको पूर्वी भेगस्थित शालिनदीमा पौष शुक्ल पूर्णिमादेखि सुरु भएको माधवनारायण व्रत पनि आज समापन हुँदैछ।