ललितपुरमा श्रीमतीको हत्या गरी श्रीमान् आफैं पुगे प्रहरी कार्यालय

ललितपुर । ललितपुरमा श्रीमतीको हत्या गरी श्रीमान् स्वयं प्रहरी कार्यालय पुगेर आत्मसमर्पण गरेका छन्।

प्रहरीका अनुसार ललितपुरको गोदावरी नगरपालिका–७ देवीचौरका ३० वर्षीय विनादे पाख्रिनले आफ्नी २३ वर्षीया श्रीमती कोपिला पाख्रिनको हत्या गरेका हुन्। श्रीमतीको हत्या गरेपछि पाख्रिन टिकाभैरव प्रहरी चौकी पुगेर आफूले अपराध गरेको स्वीकार गर्दै आत्मसमर्पण गरेको जिल्ला प्रहरी परिसर ललितपुरका प्रहरी उपरीक्षक (एसपी) गौतम मिश्रले जानकारी दिए।

प्रारम्भिक अनुसन्धानका अनुसार दुवै जनाले मदिरा सेवन गरेपछि आपसी विवाद भएको र सोही क्रममा पाख्रिनले चिर्पटले प्रहार गर्दा कोपिलाको घटनास्थलमै मृत्यु भएको प्रहरीको भनाइ छ। घटनापछि शव खाटमै राखिएको अवस्थामा फेला परेको प्रहरीले जनाएको छ।

घटना शुक्रबार बिहानको भएको र सूचना पाएलगत्तै प्रहरी टोली घटनास्थलमा पुगेर आवश्यक अनुसन्धान सुरु गरिएको एसपी मिश्रले बताए। हाल आरोपी पाख्रिनलाई नियन्त्रणमा लिएर घटनाको विस्तृत अनुसन्धान अघि बढाइएको छ।

प्रहरीले घटनाका थप विवरण, हत्या हुनुका कारण र पृष्ठभूमिबारे अनुसन्धान जारी रहेको जनाएको छ।