८५ वर्षमा पटक–पटक व्यवस्था फेरियो, सत्ताको चरित्र फेरिएन : बालेन शाह

काठमाडौं । राष्ट्रिय स्वतन्त्र पार्टीका वरिष्ठ नेता बालेन्द्र शाहले ८५ वर्षसम्म पटक–पटक राजनीतिक व्यवस्था फेरिए पनि सत्ताको चरित्र भने नफेरिएको टिप्पणी गरेका छन्।

शुक्रबार शहीद दिवसका अवसरमा शहीदहरूलाई श्रद्धाञ्जली अर्पण गर्दै बालेनले भने, “राणाशासनको अन्त्यको माग गर्दै संघर्ष गर्ने गंगालाल श्रेष्ठ, दशरथ चन्द, धर्मभक्त माथेमा र शुक्रराज शास्त्रीको तत्कालीन राज्यले क्रूरतापूर्वक हत्या गरेको ८५ वर्ष भएको छ। त्यसको १० वर्षपछि राणाशासन अन्त्य भयो, तर राज्य जनताको बन्न सकेन।”

उनले त्यसयता पनि नेपाली जनताले निरन्तर संघर्ष गर्नुपरेको उल्लेख गर्दै भने, “८५ वर्षमा पटक–पटक व्यवस्था फेरियो, तर सत्ताको चरित्र फेरिएन।”

बालेनले पटक–पटक नेपाली जनता शहीद भए पनि शहीदका सपना अझै पूरा हुन नसकेको बताए। “८५ वर्ष पहिलेजस्तै, यसपटक पनि भदौको जेन–जी आन्दोलनमा सुशासन र भ्रष्टाचार अन्त्यको माग गर्दै शान्तिपूर्ण आन्दोलनमा उत्रिएका युवा र विद्यार्थीले आफ्नो अमूल्य जीवन बलिदान दिनुपर्‍यो,” उनले उल्लेख गरेका छन्।