प्रतिनिधि सभा निर्वाचनः समानुपातिकतर्फको मतपत्र छपाइको काम सकियाे

काठमाडौं । आगामी फागुन २१ गते हुने प्रतिनिधिसभा सदस्य निर्वाचनअन्तर्गत समानुपातिक निर्वाचन प्रणालीतर्फको मतपत्र छपाइ कार्य सम्पन्न भएको छ।

निर्वाचन आयोगका अनुसार जनक शिक्षा सामग्री केन्द्र लिमिटेड, सानोठिमीमा सोमबार समानुपातिकतर्फ २ करोड ८ लाख ५० हजार प्रति मतपत्र छपाइ सम्पन्न गरिएको हो।

केन्द्रका प्रबन्ध निर्देशक यदुनाथ पौडेलले समानुपातिकतर्फको मतपत्र छपाइ पूरा भएसँगै प्रत्यक्ष (पहिलो हुने निर्वाचित हुने) प्रणालीतर्फको मतपत्र छपाइ सुरु भइसकेको जानकारी दिनुभयो। उहाँका अनुसार प्रत्यक्षतर्फको छपाइ कार्य सोमबारदेखि औपचारिक रूपमा सुरु गरिएको छ।

यसअघि केन्द्रले १० लाख ९८ हजार २०० नमुना मतपत्र छपाइ गरी निर्वाचन आयोगलाई पठाइसकेको थियो । ती मतपत्रहरू मतदाता सचेतना तथा अन्य प्रयोजनका लागि प्रयोग भइरहेका छन्।