राष्ट्रिय झण्डा प्रयोगमा उच्च सम्मान र सतर्कता राख्न कांग्रेसको ५ बुँदे परिपत्र

काठमाडौं । नेपाली कांग्रेसले चुनावी प्रचारका क्रममा राष्ट्रिय झन्डा प्रयोग गर्दा विशेष ध्यान दिन मातहतका पार्टी संरचनालाई परिपत्र जारी गरेको छ।

निर्वाचन परिचालन समितिका प्रमुखसमेत रहेका उपसभापति विश्वप्रकाश शर्माले सातै प्रदेश, जिल्ला र निर्वाचन क्षेत्रलाई परिपत्र पठाउँदै निर्वाचन आचारसंहिता अनुसार राष्ट्रिय झन्डाको सम्मानजनक प्रयोग गर्न निर्देशन दिएका हुन्।

परिपत्रमा चुनावी प्रचारमा १० वटाभन्दा बढी राष्ट्रिय झन्डा प्रयोग नगर्न आग्रह गरिएको छ। साथै,उम्मेदवार वा प्रचारक कसैले पनि राष्ट्रिय झन्डा शिरभन्दा माथि सम्मानपूर्वक फहराउनुपर्ने उल्लेख गर्दै पाखुरा, कम्मर वा घाँटीमा बेर्ने कार्य झन्डाको अपमान हुने कांग्रेसले जनाएको छ।

त्यसैगरी, चुनावी कार्यक्रम स्थल, प्रचार कार्यालय तथा सवारी साधनमा राष्ट्रिय झन्डा पार्टीको झन्डाभन्दा माथि राख्न पार्टी पङ्क्तिलाई अनुरोध गरिएको छ।