आधिकारिकता दाबी गर्दै देउवा पक्षीय कांग्रेस सर्वोच्च जाँदै

काठमाडौं । नेपाली कांग्रेसका शेरबहादुर देउवा समूहले पार्टीको आधिकारिकता माग्दै आज सर्वोच्च अदालत जाने भएको छ। निर्वाचन आयोगले कांग्रेसको मान्यता नदिएपछि देउवा पक्ष सर्वोच्च अदालत जाने तयारीमा जुटेको हो।

पार्टीको दोस्रो विशेष महाधिवेशनबाट निर्वाचित गगनकुमार थापाको नेतृत्वलाई निर्वाचन आयोगले कांग्रेसको आधिकारिक मान्यता दिएपछि देउवा समूह त्यसको विरोधमा उत्रिएको छ।

शनिबार कांग्रेस केन्द्रीय कार्यालयमा बसेको देउवा समूहको बैठकले निर्वाचन आयोगको निर्णयविरुद्ध कानुनी लडाइँ लड्ने निर्णय गरेको हो। आयोगबाट निरुपण भइसकेकाले अब सर्वोच्च अदालत जाने निष्कर्षमा बैठक पुगेको जनाइएको छ।

बैठकले यस विषयमा आवश्यक कानुनी प्रक्रिया अघि बढाउने जिम्मेवारी कार्यबाहक सभापति पूर्णबहादुर खड्कालाई दिएको छ।