कांग्रेस आधिकारिकता विवाद: गगन थापा समूहद्वारा निर्वाचन आयोग अगाडि धर्ना

काठमाडौं । विशेष महाधिवेशनबाट निर्वाचित गगन थापा नेतृत्वको नेपाली कांग्रेसले पार्टीको आधिकारिकता माग गर्दै निर्वाचन आयोग अगाडि धर्ना दिएको छ।

शुक्रबार दिउँसो गगन थापा नेतृत्वको विशेष महाधिवेशनबाट निर्वाचित नेताहरूले आयोग परिसर अगाडि धर्ना दिएका हुन्। आयोगले ढिलाइ नगरी आफूहरूलाई आधिकारिक घोषणा गर्नुपर्ने माग उनीहरूको छ।

यसअघि शुक्रबार बिहान कांग्रेसका कार्यवाहक सभापति पूर्णबहादुर खड्कासहित देउवा पक्षका नेताहरूले आफूहरू नै पार्टीको आधिकारिक पक्ष भएको दाबी गर्दै निर्वाचन आयोगमा निवेदन दिएका थिए। आयोगले भने संविधान, राजनीतिक दलसम्बन्धी ऐन, नेपाली काँग्रेसको विधान र विगतका नजिरका आधारमा निर्णय गरिने स्पष्ट पारेको छ।

आयोगको उक्त जवाफपछि गगन थापा समूहले आधिकारिकताको निर्णयमा दबाब दिन धर्ना दिएको हो। यसअघि बिहीबार थापा समूहले विशेष महाधिवेशनमार्फत निर्वाचित केन्द्रीय कार्यसमितिको विवरण अद्यावधिक गर्न निर्वाचन आयोगमा निवेदन दिएको थियो।