देशलाई अब दीर्घकालीन दृष्टिकोण र इमानदार नेतृत्व चाहिन्छ : मेयर बालेन

काठमाडौं । काठमाडौं महानगरपालिकाका मेयर बालेन्द्र शाह (बालेन) ले देशलाई अब अल्पकालीन निर्णय होइन, दीर्घकालीन दृष्टिकोण आवश्यक रहेको बताएका छन्। लोकप्रिय नाराभन्दा इमानदार नेतृत्व आजको मुख्य आवश्यकता भएको उनले उल्लेख गरेका छन् ।

२७औँ राष्ट्रिय भूकम्प सुरक्षा दिवसका अवसरमा सामाजिक सञ्जालमा उनले लेखेका छन्, “स्ट्रक्चरल इन्जिनियरको रूपमा मैले बुझेको कुरा स्पष्ट छ– देशलाई अब अल्पकालीन निर्णय होइन, दीर्घकालीन दृष्टिकोण चाहिएको छ। अब लोकप्रिय नारा होइन, इमानदार नेतृत्व चाहिएको छ।”

मेयर शाहले आफूहरू राजनीतिमा आउनुको मूल उद्देश्य नेपाललाई सुरक्षित, दिगो र व्यवस्थित बनाउनु रहेको बताएका छन्। शासन प्रणाली जनताको विश्वास जित्ने खालको हुनुपर्नेमा उनले जोड दिएका छन्।

“नीति यस्तो बन्नेछ, जसले संकट आउनुअघि तयारी हुनेछ। संरचना यस्तो बन्नेछ, जसले विपद् सहन सकोस्,” उनले उल्लेख गरेका छन्, “शासन यस्तो बनोस्, जसले जनताको विश्वास जितोस्।”

मेयर शाहले नेपालजस्तो उच्च भूकम्पीय जोखिम भएको देश केवल सिभिल इन्जिनियरिङको कोणबाट मात्र सुरक्षित बन्न नसक्ने उल्लेख गर्दै, संरचनागत सुधारसँगै नीति, नेतृत्व र सामाजिक चेतनालाई पनि सँगसँगै अघि बढाउनुपर्ने आवश्यकता औंल्याएका छन्।