सुनसरीमा मार्बल बोकेको ट्रक दुर्घटना: ५ जना कामदारको मृत्यु, ३ घाइते

सुनसरी ।  सुनसरीको भोक्राहनरसिंह गाउँपालिका–स्थित फुलचोकमा बिहीबार बिहान मार्बल बोकेको ट्रक पल्टिदा ५ जनाको मृत्यु भएको छ भने ३ जना घाइते भएका छन् ।

विराटनगरबाट मार्बल लोड गरेर हुलाकी राजमार्ग हुँदै सुनसरीतर्फ आउँदै गरेको को १ ख ४५४१ नम्बरको ट्रक अनियन्त्रित भई सडकमा पल्टिएको जिल्ला प्रहरी कार्यालय सुनसरीले जनाएको छ ।

दुर्घटनामा ट्रकमा लोड गरिएको मार्बलमाथि बसेका ५ जना कामदार सोही मार्बलले किचिएर घटनास्थलमै मृत्यु भएको हो ।

सुनसरीका एसपी केशवकुमार थेवेले नेपाल लिडलाई दिएको जानकारी अनुसार ज्यान गुमाउनेहरुमा ३२ वर्षीय धीरेन्द्र गुरुङ, ५५ वर्षीय बर्मदेश गुरुङ, ५० वर्षीय टंक गुरुङ, ४५ वर्षीय चन्द्र गुरुङ र २८ वर्षीय निशु गुरुङ रहेका छन् ।  उनीहरू सबै सुनसरीकै बर्जु गाउँपालिका–१ का बासिन्दा भएको थापाले जनाएका छन् ।

थेवेका अनुसार दुर्घटनामा घाईते सुन्दर गुरुङ, बैज गुरुङ र मानबहादुर गुरुङको विराटनगरस्थित विराट अस्पतालमा उपचार भइरहेको छ ।