राष्ट्रिय लिग फुटबलमा आज दुई खेल, संकटा–सातदोबाटो र लालिगुराँस–जावलाखेल भिड्दै

काठमाडौं । राष्ट्रिय लिग फुटबलअन्तर्गत आज पनि दुई खेल हुँदैछन् । पहिलो खेल बिहान ११ बजे सातदोबाटो युथ क्लब र संकटा एफसीबीच हुनेछ भने दोस्रो खेल दिउँसो ३ बजे लालिगुराँस एशोसिएसन र जावलाखेल युथ क्लबबीच प्रतिस्पर्धा हुनेछ ।

दुवै खेल सातदोबाटोस्थित एन्फा कम्प्लेक्समा हुनेछन् ।

यसअघि हिजो श्री भगवती क्लब र चर्च ब्वाइज युनाइटेडबीचको खेल बराबरीमा सकिएको थियो । एन्फा कम्प्लेक्समै भएको उक्त खेलमा दुवै टोलीले १–१ गोल गरे । भगवतीका लागि हरिहर बुढामगर र चर्च ब्वाइजका लागि एरिक विष्टले गोल गरेका थिए ।

त्यसअघि उद्घाटन खेलमा फ्रेन्ड्स क्लबले काँक्रेबिहार क्लबलाई ३–१ ले पराजित गर्दै विजयी सुरुआत गरेको थियो । फ्रेन्ड्सका प्रशान्त लक्षम, प्रवेश बस्नेत र आशिष चापागाईंले गोल गरेका थिए ।

अखिल नेपाल फुटबल सङ्घ (एन्फा) को आयोजनामा हिजोदेखि सुरु भएको राष्ट्रिय लिग फुटबल प्रतियोगितामा १७ वटा टोली सहभागी छन् । सिङ्गल राउन्ड रोबिनका आधारमा सञ्चालन हुने लिगमा कुल १ सय ३६ खेल हुनेछन् ।