निर्वाचन प्रक्रिया अघि बढाउँदै कांग्रेस विशेष महाधिवेशन पक्ष, वार्ता पनि सँगसँगै

काठमाडौं । नेपाली कांग्रेसको विशेष महाधिवेशनमा निर्वाचन प्रक्रिया औपचारिक रूपमा अघि बढाइएको छ। विशेष महाधिवेशन पक्ष र संस्थापन पक्षबीच रातभर विभिन्न चरणमा भएका वार्ता निष्कर्षमा नपुगेपछि निर्वाचनमार्फत पार्टीको नीति र नेतृत्व परिवर्तन गर्ने निर्णय गरिएको विशेष महाधिवेशन व्यवस्थापन सचिवालयले जनाएको छ।

सचिवालयका अनुसार सभापति शेरबहादुर देउवा नेतृत्व छोड्न तयार नभएपछि सहमति सम्भव नभएको हो। यही कारण निर्वाचन प्रक्रियालाई अघि बढाउने निर्णय लिइएको बताइएको छ।

विशेष महाधिवेशन प्रचार–प्रसार उपसमिति संयोजक सुवास पोखरेलले संस्थापन पक्षबाट अन्तिम चरणको वार्ताको प्रयास भइरहेको जानकारी आएको भन्दै त्यसलाई पनि सम्मान गरिने बताए। उनले भने, “हाम्रो निर्वाचन तालिका यथावत् छ। यदि सहमति जुटेन भने निर्वाचन प्रक्रिया अघि बढ्छ।”

उनले सभापति देउवाले नेतृत्व हस्तान्तरण गर्दै बाँकी जीवन पार्टी र व्यक्तित्वसम्बन्धी लेखनमा समर्पित गर्नुपर्ने धारणा राख्दै अब निर्वाचन प्रक्रियामात्र विकल्प रहेको उल्लेख गरे।

यसैबीच, महामन्त्रीद्वय गगनकुमार थापा र विश्वप्रकाश शर्माको प्रतिवेदन मंगलबार साँझ पारित भएसँगै बन्दसत्र समापन भएको छ। विशेष महाधिवेशन पक्षधर नेताहरूले पदाधिकारीको खाका तयार गरिरहेको पनि जनाइएको छ।

आज बिहान पनि वार्ताको ढोका खुला राख्दै नयाँ निर्वाचन तालिकाअनुसार प्रक्रिया अघि बढाइने भएको छ। केन्द्रीय निर्वाचन समिति संयोजक वरिष्ठ अधिवक्ता सीताराम केसीका अनुसार उम्मेदवारी मनोनयन दर्ताका लागि बिहान ८:१५ बजेदेखि ९:१५ बजेसम्म समय थप गरिएको छ।