अब कांग्रेसमा विशेष महाधिवेशन हुने गगनकुमार थापाको संकेत

काठमाडौं ।  नेपाली कांग्रेसका महामन्त्री गगनकुमार थापाले पार्टीभित्रको एकता र जनतासँगको उत्तरदायित्वलाई जोड दिँदै अबको विशेष महाधिवेशन महत्वपूर्ण हुने बताएका छन्।

सामाजिक सञ्जालमार्फत राष्ट्रिय एकता र मेलमिलाप दिवसको अवसरमा शुभकामना व्यक्त गर्दै उनले लेखेका छन्– ‘एकले अर्कोलाई विरोध र निषेध गरेर होइन, राष्ट्र निर्माणको सामूहिक उत्तरदायित्व बोधका साथ अगाडि बढ्ने प्रेरणा हामी सबैमा मिलोस्।’

महामन्त्री थापाले पौष मसान्तभित्र पार्टीको विशेष महाधिवेशन गर्ने तयारीलाई अनिवार्य मात्र नभई पार्टीभित्रको आत्मविश्वास र एकताको लागि अत्यावश्यक भएको बताएका छन्। उनी भन्छन्, “नेपाली कांग्रेसले राष्ट्रिय भूमिका निर्वाह गर्न आत्मविश्वास खोज्दैछ, र त्यो आत्मविश्वास एकताबाट मात्र आउँछ। निषेध र फरक मतलाई बेवास्ता गरेर होइन, साझा मञ्च प्रयोग गरेर मात्र पार्टीभित्रको एकता सम्भव छ। यही साझा मञ्च नै अहिलेको विशेष महाधिवेशन हो।”

थापाले सबै नेता र कार्यकर्तालाई हातेमालो गर्दै पार्टी एकताबद्ध हुन आह्वान समेत गरेका छन्। उनी यो पनि स्मरण गराउँछन् कि आजभन्दा ४९ वर्ष अघि २०३३ साल पुस १६ गते बीपी कोइराला, गणेशमान सिंहलगायत नेताहरू भारतको निर्वासनबाट फर्केर राष्ट्रिय एकता र मेलमिलापको नीति अघि बढाएका थिए।

यसरी गगनकुमार थापाले कांग्रेसको भविष्य र राष्ट्रिय उत्तरदायित्व जोड्दै पार्टीभित्र एकताको महत्त्वलाई फेरि जोड दिएका छन्।