सरकारलाई एमालेको प्रश्न ‘भगाईएका कैदी, लुटिएका हतियारबीच भयरहित निर्वाचन कसरी सम्भव?’

काठमाडौं । नेकपा (एमाले) का नेता प्रदीप ज्ञवालीले मुलुकमा भयरहित वातावरणमा निर्वाचन सम्पन्न हुने अवस्था अझै नबनेको बताएका छन्। काठमाडौंमा आयोजित कार्यक्रममा उनले भगाईएका कैदी, लुटिएका हतियार र सुरक्षा कर्मीहरूको कमजोर मनोबलले आगामी निर्वाचन चुनौतीपूर्ण बन्ने बताएका छन्।

फागुन २१ का लागि निर्वाचन मिति घोषणा भइसके पनि विघटित प्रतिनिधि सभाका बहुसंख्यक सांसदहरूले विघटनविरुद्ध उठाएका संवैधानिक र न्यायिक प्रश्नहरूको परीक्षण अझै बाँकी रहेको भन्दै ज्ञवालीले निर्वाचन निश्चित नभएको बताए।

‘निर्वाचनको मिति तय भएको छ, तर प्रतिनिधि सभाको विघटनको विषयमा संवैधानिक र न्यायिक प्रक्रिया अझै चलिरहेको छ,’ उनले भने, ‘त्यसैगरी, भगाईएका हजारौं कैदी र लुटिएका आधुनिक हतियार तथा सुरक्षा कर्मीहरूको कमजोर मनोबलबीच भयरहित निर्वाचन कसरी सम्भव हुन्छ भन्ने यक्ष प्रश्न यथावत छ।’

ज्ञवालीले पपुलिजममा आधारित राजनीतिले मुलुकलाई स्थायी प्रगति गर्न नसक्ने पनि जोड दिए।