ज्येष्ठ नागरिकका लागि विशेष हटलाइन ‘१११५’ र प्रदेश–प्रदेशमा नि:शुल्क एम्बुलेन्स सेवा

काठमाडौं । पाँचौँ राष्ट्रिय ज्येष्ठ नागरिक दिवसको अवसरमा सरकारले ज्येष्ठ नागरिकहरूको सम्मान, संरक्षण र मर्यादित जीवन सुनिश्चित गर्ने उद्देश्यसहित नयाँ कल्याणकारी कार्यक्रमहरू सार्वजनिक गरेको छ। “हाम्रो साझा अभियान: ज्येष्ठ नागरिकप्रति श्रद्धा र सम्मान” भन्ने राष्ट्रिय नारासहित सुरु गरिएका यी कार्यक्रमहरूले राज्यको सामाजिक उत्तरदायित्वलाई थप सुदृढ बनाउने अपेक्षा गरिएको छ।

समाजका अनुभवी, ज्ञानका धनी र अग्रज नागरिकका रूपमा रहेका ज्येष्ठ नागरिकहरूको जीवनस्तर सुधार गर्न सरकारले विशेष पहल थालेको जनाएको छ। विशेषगरी स्वास्थ्य, यातायात र आपत्कालीन सेवामा केन्द्रित यी कार्यक्रमहरूलाई प्राथमिकताका साथ कार्यान्वयन गरिने बताइएको छ।

स्वास्थ्य गुनासोका लागि विशेष हटलाइन ‘१११५’
ज्येष्ठ नागरिकहरूले भोग्दै आएका स्वास्थ्यसम्बन्धी समस्या र गुनासोहरू सिधै सुन्ने उद्देश्यले ‘१११५’ नम्बरको विशेष हटलाइन सेवा सञ्चालनमा ल्याउने तयारी गरिएको छ। स्वास्थ्य मन्त्रालयसँगको सहकार्यमा अघि बढाइएको यस सेवामार्फत ज्येष्ठ नागरिकहरूले कुनै पनि समय आफ्ना स्वास्थ्य समस्या, सेवा–सुविधासम्बन्धी गुनासा तथा सुझावहरू सिधै सम्बन्धित निकायसमक्ष राख्न सक्नेछन्। यसले स्वास्थ्य सेवामा पहुँच सहज बनाउनुका साथै समस्या समाधानको प्रक्रिया छिटो हुने विश्वास गरिएको छ।

एक महिनाभित्रै प्रदेशैपिच्छे नि:शुल्क एम्बुलेन्स सेवा
सरकारले हरेक प्रदेशमा ज्येष्ठ नागरिक लक्षित नि:शुल्क एम्बुलेन्स सेवा उपलब्ध गराउने प्रतिबद्धता जनाएको छ। आवश्यक तयारी भइरहेको र एक महिनाभित्रै सेवा सञ्चालनमा ल्याउने लक्ष्य राखिएको मन्त्रालयले जनाएको छ। विशेषगरी पशुपति वृद्धाश्रमको अनुगमनका क्रममा देखिएको स्वास्थ्यकर्मी र एम्बुलेन्सको अभावलाई ध्यानमा राख्दै उक्त आश्रमको स्तरोन्नतिसमेत अघि बढाइएको छ।

सार्वजनिक यातायातमा थप सुविधा र छुट
ज्येष्ठ नागरिकहरूको दैनिक आवतजावतलाई सहज, सुरक्षित र सम्मानजनक बनाउन सार्वजनिक यातायातमा थप सुविधा तथा छुट उपलब्ध गराउने विषयमा भौतिक पूर्वाधार तथा यातायात मन्त्रालयसँग समन्वय भइरहेको जनाइएको छ। यस पहलले ज्येष्ठ नागरिकहरूलाई सार्वजनिक सेवा प्रयोग गर्दा भोग्नुपर्ने कठिनाइ कम गर्ने अपेक्षा गरिएको छ।

ऐतिहासिक पृष्ठभूमि र साझा जिम्मेवारी
नेपाल सरकारले २०५१ साल पौष ११ गते पहिलो पटक वृद्धभत्ता घोषणा गरेको ऐतिहासिक दिनको स्मरणमा २०७८ सालदेखि राष्ट्रिय ज्येष्ठ नागरिक दिवस मनाउन थालेको हो। ज्येष्ठ नागरिकहरूको संरक्षण, सम्मान र अधिकार सुनिश्चित गर्नु राज्यको मात्र दायित्व नभई परिवार, समाज, स्थानीय तह र सम्पूर्ण सरोकारवालाहरूको साझा जिम्मेवारी भएको सरकारले स्पष्ट पारेको छ।

तस्वीरहरू