बालाजुमा टिपरले मोटरसाइकललाई ठक्कर दियो, एकको मृत्यु

काठमाडौँ .  काठमाडौँको बालाजुमा टिपरले मोटरसाइकललाई ठक्कर दिँदा एक युवकको मृत्यु भएको छ । दुर्घटनामा अर्का युवक गम्भीर घाइते भएका छन् ।

काठमाडौँको बालाजु बाइसधारा मन्दिर नजिकै गए राति करिब साढे १० बजे बा.प्र–०१–००६ ख ३४५४ नम्बरको टिपरले लु.५९ प ७०६४ नम्बरको पल्सर मोटरसाइकललाई ठक्कर दिएको थियो ।  

दुर्घटनामा अर्घाखाँचीको मालारानी गाउँपालिका –५ घर भई हाल काठमाडौँको बसुन्धरा बस्ने २१ वर्षीय सागर खड्काको मृत्यु भएको प्रहरीले जनाएको छ । खड्कको उपचारका राष्ट्रिय ट्रमा सेन्टरमा मृत्यु भएको हो ।

त्यस्तै दुर्घटनामा गम्भीर घाइते अर्घाखाँची सन्धिखर्क नगरपालिका घर भई हाल बालाजु हाइट बस्ने २२ वर्षीय लक्ष्मण राउतÞको त्रिवि शिक्षण अस्पतालमा उपचार भइरहेको छ । दुर्घटनापछि टिपर चालक फरार छन् ।