दिउँसो २ बजेसम्म देशभर करिब ३३ प्रतिशत मतदान, कुन प्रदेशमा कति ?

काठमाडौं ।  प्रतिनिधिसभा सदस्य निर्वाचनअन्तर्गत देशभर मतदान जारी रहँदा दिउँसो २ बजेसम्मको मतदान विवरण सार्वजनिक भएको छ। निर्वाचन आयोगले सार्वजनिक गरेको पछिल्लो तथ्याङ्कअनुसार दिउँसो २ बजेसम्म देशभर करिब ३३ प्रतिशत मतदान भएको छ। बिहान ७ बजेदेखि सुरु भएको मतदान साँझ ५ बजेसम्म जारी रहने भएकाले अन्तिम समयसम्म मतदान प्रतिशत अझ बढ्ने अपेक्षा गरिएको छ।

आयोगका अनुसार हालसम्म देशभर ६३ लाख २० हजारभन्दा बढी मत खसेको छ। देशभर कुल १ करोड ८२ लाखभन्दा बढी मतदाता रहेका छन् भने १० हजारभन्दा बढी मतदानस्थल र २० हजारभन्दा बढी मतदान केन्द्रमार्फत मतदान भइरहेको छ।

प्रदेशगत मतदान अवस्था
निर्वाचन आयोगले सार्वजनिक गरेको विवरणअनुसार प्रदेश तथा क्षेत्रगत रूपमा मतदान प्रतिशत फरक–फरक देखिएको छ।
काठमाडौँ उपत्यकामा ४७ प्रतिशत मतदान भएको छ, जुन अहिलेसम्मको सबैभन्दा उच्च प्रतिशत हो। उपत्यकामा बिहानदेखि नै मतदाताको भीड देखिएको थियो।
यस्तै कोशी प्रदेशमा ३२ प्रतिशत मतदान भएको छ। मधेस प्रदेशमा भने तुलनात्मक रूपमा कम मतदान भएको देखिएको छ, जहाँ २८ प्रतिशत मात्रै मत खसेको छ।

बागमती प्रदेशमा ३४ प्रतिशत मतदान भएको आयोगले जनाएको छ। गण्डकी प्रदेशमा ३९ प्रतिशत मतदान भएको छ, जुन उपत्यकापछि उच्च मानिएको छ।

लुम्बिनी प्रदेशमा २९ प्रतिशत मतदान भएको छ भने कर्णाली प्रदेशमा ३६ प्रतिशत मत खसेको छ। सुदूरपश्चिम प्रदेशमा ३३ प्रतिशत मतदान भएको विवरण आयोगले सार्वजनिक गरेको छ।