पाँचथरका मुख्य निर्वाचन अधिकृतले भोट हाल्न पाएनन्

पाँचथर । पाँचथरका मुख्य निर्वाचन अधिकृतकै मतदाता नामावली नभएको पाइएको छ ।

विहान साढे ७ बजे पाँचथर कारागारस्थित अस्थायी मतदान केन्द्रमा पुगेका मुख्य निर्वाचन अधिकृत कुमार मास्केको नाम मतदाता नामावलीमा नभेटिएपछि उनले मतदान गर्न पाएनन् । 

पाँचथरका प्रमुख जिल्ला अधिकारी वासुदेव दाहाल र डीएसपी अनिषकुमार कर्ण लगायत कर्मचारीले यही केन्द्रबाट भोट हालेका छन् ।
पाँचथरका सबै केन्द्रमा प्रतिनिधिसभा सदस्य निर्वाचनअन्तर्गत शान्तिपूर्ण रूपमा मतदान जारी छ । केही केन्द्रमा निर्धारित समयभन्दा १०÷१५ मिनेट ढिला गरी मतदान सुरु भएको थियो । 

राजनीतिक दलका प्रतिनिधि समयमा नआइपुग्दा मतदान ढिला सुरु भएको जिल्ला निर्वाचन कार्यालयले जनाएको छ ।
जिल्लाभर शान्तिपूर्ण रूपमा मतदान भइरहेको र एक घण्टाको अवधिमा झन्डै एक हजार ५०० मत खसेको जनाइएको छ ।