कपिलवस्तु–३ मा दुई पूर्वमन्त्रीसहित ३६ उमेदवार चुनावी मैदानमा, ‘हेभिवेट’लाई नयाँको काउन्टर

कपिलवस्तु । कपिलवस्तु जिल्लाका तीन प्रतिनिधिसभा क्षेत्रमध्ये कपिलवस्तु–३ यसपटक विशेष चासोको केन्द्रमा छ । यहाँ कृष्णनगर नगरपालिका (१–१२), महाराजगंज नगरपालिका (५, ६, ७), शिवराज नगरपालिका (१–११) र विजयनगर गाउँपालिका (१–७) का वडा पर्छन् ।
यसपटक १,१८,४०४ मतदाता छन् । २०७९ मा १,१५,५४३ थिए। अर्थात् २,८६१ मतदाता थपिएका छन् । अंकगणितले भन्छ—साना अन्तरले पनि नतिजा बदलिन सक्छ ।

मुख्य प्रतिस्पर्धा एमाले, कांग्रेस, नेकपा, रास्वपा, राप्रपा र जनमतबीच देखिन्छ । तर केन्द्रमा छन्—कृष्णनगर–२ का तीन पुराना प्रतिस्पर्धी ।

अभिषेक प्रताप शाह (नेपाली कांग्रेस) – विरासत र युवा छविको परीक्षा
४३ वर्षीय अभिषेक प्रताप शाह कृष्णनगर–२ निवासी हुन् । २०७९ मा १८,९८३ मतसहित दोस्रो स्थानमा रहे । उनको परिवार २०१५ सालअघि देखि कांग्रेससँग जोडिएको छ। हजुरबुबा शिवप्रताप शाह २०१५ सालमा मन्त्री बनेका थिए । २०६३ मा उनलाई तत्कालीन प्रधानमन्त्री गिरिजाप्रसाद कोइरालाले प्रतिनिधिसभा सदस्यमा मनोनित गरेका थिए । २०६४ र २०७० मा संविधानसभा सदस्य निर्वाचित भएका शाह २५ वर्ष ३ महिनाको उमेरमा मुलुककै कान्छो संविधानसभा सदस्य बने । २०७४ पछि कांग्रेसमा सक्रिय रहँदै आमन्त्रित केन्द्रीय सदस्य बनेका छन् । उनी युवालाई रोजगारी र उद्यमशीलतामा जोड दिने एजेन्डासहित मैदानमा छन् । चुनौती भनेको—२०७९ को मतलाई जितमा रूपान्तरण गर्नु ।

वीरेन्द्रकुमार कानोडिया (एमाले) – अनुभव र संगठनको भरोसा
६६ वर्षीय वीरेन्द्रकुमार कानोडिया पनि कृष्णनगर–२ कै बासिन्दा हुन् । विद्यार्थी राजनीतिबाट यात्रा सुरु गरेका उनी लामो समय कांग्रेसमा सक्रिय रहे । २०५८ सालमा शेरबहादुर देउवा नेतृत्वको सरकारमा जलस्रोत राज्यमन्त्री बने । २०७४ मा लुम्बिनी प्रदेशसभा (कपिलवस्तु–३ (२)) बाट निर्वाचित भए । गत माघ ३ गते एमाले प्रवेश गरेर यसपटक एमाले उम्मेदवार बनेका छन् । युवालाई स्वरोजगार र आत्मनिर्भर बनाउने कार्यक्रम आफ्नो प्राथमिकता भएको बताउँछन् ।

एहसान अहमद खाँ (नेकपा)– वाम ध्रुवीकरणको आशा
६२ वर्षीय एहसान अहमद खाँ पनि कृष्णनगर–२ निवासी हुन् । २०७४ मा बहुजन शक्तिबाट चुनाव लडेका उनी २०७६ मा माओवादी केन्द्रमा प्रवेश गरे । अहिले माओवादी केन्द्र र एकीकृत समाजवादी मिलेर बनेको नेकपाबाट उम्मेदवार छन् । उनको एजेन्डा—गुणस्तरीय शिक्षा, प्राविधिक क्याम्पस स्थापना र कृषि आधुनिकीकरण रहेको छ ।

अन्य प्रतिस्पर्धी
रास्वपाबाट प्रकाश रजौरिया, राप्रपाबाट प्रेम शंकर शुक्ल र जनमतबाट ईश्वर कुमार राउत मैदानमा छन्। राष्ट्रिय जनमोर्चा, बहुजन शक्ति पार्टी, नेपाल जनता पार्टी, नेकपा (माओवादी), राष्ट्रिय मुक्ति पार्टी नेपाल, आम जनता पार्टी, जनता लोकतान्त्रिक पार्टी र २३ स्वतन्त्र उम्मेदवार पनि चुनावी प्रतिस्पर्धामा छन् ।

२०७९ सालको निर्वाचन परिणाम :

प्रत्यक्षतर्फ एमालेका मंगलप्रसाद गुप्ता २२,६१९ मतसहित विजयी भएका थिए । कांग्रेसका अभिषेक शाहले १८,९८३ मत पाएका थिए । राप्रपाले १४,०३० मत ल्याएको थियो । समानुपातिकतर्फ एमाले १६,२७२ मतसहित अग्रस्थानमा थियो। राप्रपा १०,७६०, कांग्रेस ९,३९४, जनमत ८,८१९ र माओवादी केन्द्र ३,५२७ मतमा थिए ।

अन्ततः कपिलवस्तु–३ को चुनाव अनुभव, विरासत र नयाँ समीकरणबीचको प्रतिस्पर्धा बनेको छ । निर्णायक मत ग्रामीण क्षेत्रमा देखिन्छ—र त्यसले अन्तिम नतिजा तय गर्नेछ ।