विश्वप्रकाश शर्मा भन्छन् “यो चुनाव जित–हारको होइन, देश सम्हाल्ने क्षमताको परीक्षा हो”

जनकपुरधाम । जनकपुरधाममा आयोजित चुनावी सभामा कांग्रेस उपसभापति विश्वप्रकाश शर्माले देश र मधेश दुवै संकटपूर्ण अवस्थाबाट गुज्रिरहेको उल्लेख गर्दै वर्तमान परिस्थितिमा नेतृत्व क्षमताको परीक्षा भइरहेको बताएका छन्। उपसभापति शर्माले बुधबार आयोजित सभामा सम्बोधन गर्दै अहिलेको निर्वाचन सामान्य प्रतिस्पर्धा मात्र नभई व्यवस्थाको स्थायित्व र सामाजिक सद्भावसँग जोडिएको विषय भएको धारणा राखे। “यो बेला देश दुखिरहेको छ, मधेश दुखिरहेको छ,” उनले भने, “प्रश्न कसले जित्छ भन्ने होइन, यस्तो समयमा देशलाई कसले सम्हाल्न सक्छ भन्ने हो।”

‘जित–हारभन्दा पद्धति जोगाउने चुनौती’
शर्माले कांग्रेसका लागि चुनावी जित वा हार नयाँ विषय नभएको उल्लेख गरे। पार्टीले विगतमा धेरै चुनाव जितेको र हारेको अनुभव रहेको स्मरण गराउँदै उनले अहिलेको बहस व्यवस्थाको भविष्यसँग सम्बन्धित भएको बताए। “जित–हार हाम्रो लागि नौलो कुरा होइन,” उनले भने, “तर आजको प्रश्न पद्धति जोगाउने कि हार्ने भन्ने हो। समाजको सद्भाव कसले कायम राख्न सक्छ भन्ने हो।” उनले लोकतान्त्रिक अभ्यासलाई मजबुत बनाउँदै सामाजिक एकता जोगाउन सक्ने शक्ति चयन गर्नु आवश्यक रहेको धारणा व्यक्त गरे।

मधेशप्रति सम्मान र कृतज्ञता
सभामा शर्माले मधेशको योगदानप्रति विशेष सम्मान व्यक्त गरे। मधेशलाई देशको अन्न भण्डारको रूपमा चित्रण गर्दै उनले यहाँका किसानप्रति कृतज्ञता प्रकट गरे। “सबै नेपालीको पेटमा सबैभन्दा बढी अन्न दिने भूमि मधेश हो,” उनले भने, “मधेशका किसान र उनीहरूको प्रत्येक दानाप्रति आभार व्यक्त गर्न हामी यहाँ आएका हौँ।”

उनले देश निर्माणमा मधेशको ऐतिहासिक र आर्थिक योगदान उल्लेख गर्दै राष्ट्रिय एकताको सन्देश पनि दिए। जनकपुरधामको सभाबाट कांग्रेसले मधेशमा आफ्नो चुनावी अभियानलाई तीव्र बनाएको संकेत दिएको छ। शर्माको अभिव्यक्तिले वर्तमान राजनीतिक परिवेशमा स्थायित्व, सहमति र जिम्मेवार नेतृत्वको आवश्यकता औँल्याएको छ।