बंगलादेश निर्वाचन : बीएनपीलाई बहुमत, खालिदा जियाका छोरा तारिक प्रधानमन्त्री बन्ने पक्का

ढाका । बंगलादेशमा सम्पन्न संसदीय निर्वाचनमा बंगलादेश नेशनल पार्टी (बीएनपी) ले स्पष्ट बहुमतसहित ऐतिहासिक जित हासिल गरेको छ। ३०० सदस्यीय संसद्मा बीएनपीले १८५ सिट जित्दै साधारण बहुमत पार गरेको स्थानीय सञ्चार माध्यमहरूले जनाएका छन्।

बिहीबार सम्पन्न मतदानपछिको मतगणना शुक्रबार बिहानसम्म जारी रहँदा बीएनपी दुई तिहाइ बहुमत नजिक पुगेको देखिएको छ। पार्टी नेताहरूले २०० भन्दा बढी सिट जित्ने दाबी गरेका छन्, जसले आगामी सरकार गठनमा बीएनपीलाई सहज स्थिति दिनेछ।

यो निर्वाचन सन् २०२४ मा युवापुस्ताको नेतृत्वमा भएको आन्दोलनपछि भएको पहिलो संसदीय चुनाव हो। उक्त आन्दोलनले तत्कालीन प्रधानमन्त्री शेख हसिना नेतृत्वको सरकारलाई सत्ताबाट बाहिरिन बाध्य बनाएको थियो। लामो समयदेखि सत्तामा रहेको अवामी लिग यसपटक निर्वाचन प्रक्रियामा सहभागी हुन पाएको थिएन।

बीएनपीका प्रमुख नेता तथा सम्भावित प्रधानमन्त्री उम्मेदवार तारिक रहमान ले गरिब परिवारलाई आर्थिक सहयोग कार्यक्रम, एक व्यक्तिले अधिकतम १० वर्ष मात्र प्रधानमन्त्री बन्न पाउने व्यवस्था, वैदेशिक लगानीमार्फत अर्थतन्त्र सुदृढीकरण र भ्रष्टाचार नियन्त्रणजस्ता नीति अघि सारेका थिए।

बीएनपीका मुख्य प्रतिस्पर्धी जमात-ए-इस्लामी ले ५६ सिट जितेको छ। पार्टी प्रमुख शफिकुर रहमान ले पराजय स्वीकार गर्दै संसद्मा सकारात्मक प्रतिपक्षको भूमिका निर्वाह गर्ने बताएका छन्। निर्वाचनलाई पछिल्ला वर्षहरूकै सबैभन्दा प्रतिस्पर्धात्मक मानिएको छ। ५० भन्दा बढी राजनीतिक दल र करिब दुई हजार उम्मेदवार चुनावी प्रतिस्पर्धामा उत्रिएका थिए। मतदान प्रतिशत ६० प्रतिशतभन्दा माथि पुग्ने अनुमान गरिएको छ, जुन अघिल्लो निर्वाचनको ४२ प्रतिशतको तुलनामा उल्लेखनीय वृद्धि हो।

निर्वाचनसँगै संवैधानिक संशोधनसम्बन्धी जनमतसंग्रह पनि सम्पन्न भएको छ। प्रस्तावित सुधारमा निर्वाचन अवधिमा तटस्थ अन्तरिम सरकार गठन, द्विसदनीय संसद् व्यवस्था, महिलाको प्रतिनिधित्व वृद्धि, न्यायपालिकाको स्वतन्त्रता सुदृढीकरण तथा प्रधानमन्त्रीका लागि दुई कार्यकालको सीमा निर्धारणजस्ता प्रावधान समावेश छन्।
नयाँ जनादेशसँगै बंगलादेशको राजनीतिक दिशा अब नयाँ मोडमा प्रवेश गरेको विश्लेषकहरूले बताएका छन्।