त्रिभुवन अन्तर्राष्ट्रिय विमानस्थल क्षेत्रमा  एक महिनाका लागि निषेधाज्ञा जारी

काठमाडौं ।  जिल्ला प्रशासन कार्यालय काठमाडौंले त्रिभुवन अन्तर्राष्ट्रिय विमानस्थल हाताभित्र आजदेखि लागू हुने गरी एक महिनासम्मका लागि निषेधाज्ञा जारी गरेको छ । विमानस्थल र आसपासको क्षेत्रमा फागुन १ गते प्रदर्शन गर्ने भन्दै केही समूह र राजनीतिक दलबाट विज्ञप्ति जारी भएपछि निषेधाज्ञा जारी गरिएको हो ।

प्रमुख जिल्ला अधिकारी ईश्वरराज पौडेलद्वारा जारी आदेशअनुसार, अब विमानस्थल प्रवेश गर्ने गोल्डेन गेटदेखि विमानस्थल परिसरभित्रको सम्पूर्ण सडक, आन्तरिक र अन्तर्राष्ट्रिय टर्मिनल क्षेत्र, पार्किङ क्षेत्र लगायतमा पाँच जनाभन्दा बढी व्यक्ति भेला भएर अनसन, धर्ना, घेराउ, जुलुस, प्रदर्शन वा सभा जस्ता विरोधका कार्यक्रम आयोजना गर्न पाइने छैन।

आदेशमा उल्लेख छ कि विमानस्थलजस्तो अत्यन्त संवेदनशील क्षेत्र र आसपासमा अनियमित भेला हुनाले भीडले तोडफोड, आगजनी र अन्य उच्छृङ्खल गतिविधि गर्न सक्ने जोखिम हुन्छ।

साथै, पूर्वजानकारी दिएर गरिने विरोध कार्यक्रमबाट सरकारी, सार्वजनिक वा व्यक्तिगत सम्पत्तिमा कुनै क्षति भए आयोजकबाट क्षतिपूर्ति असुल हुने पनि आदेशमा उल्लेख गरिएको छ।