नेकपाको नजरमा रास्वपा ‘विध्वंशकारी’, आफूलाई ‘क्रान्तिकारी शक्ति’ भएको दावी

काठमाडौं । आगामी प्रतिनिधिसभा निर्वाचनको सन्दर्भमा नेपाली कम्युनिस्ट पार्टी (नेकपा) ले आफ्नो चुनावी घोषणापत्र सार्वजनिक गर्दै मुलुकका राजनीतिक दलहरूलाई चार मुख्य वर्गमा विभाजन गरेको छ । पार्टीले आफूलाई एकमात्र ‘क्रान्तिकारी शक्ति’ का रूपमा प्रस्तुत गर्दै राष्ट्रिय स्वतन्त्र पार्टी (रास्वपा) लगायतका नयाँ शक्तिहरूलाई ‘सिद्धान्तहीन पपुलिष्ट’ र ‘भदौ २४ का विध्वंशकारी तत्वसँग जोडिएको’ भन्दै कडा आरोप लगाएको छ ।

घोषणापत्रमा राजनीतिक शक्तिहरूलाई क्रान्तिकारी, यथास्थितिवादी, पपुलिष्ट र प्रतिगामी पुनरुत्थानवादी गरी चार भागमा वर्गीकरण गरिएको छ । नेकपाले आफूलाई क्रान्तिकारी शक्तिको रूपमा उभ्याउँदै समाज रूपान्तरणका लागि स्पष्ट समाजवादी कार्यदिशा भएको दाबी गरेको छ ।

पार्टीका अनुसार नेकपा एमाले र नेपाली कांग्रेसलाई ‘यथास्थितिवादी शक्ति’ को संज्ञा दिइएको छ । घोषणापत्रमा ती दलहरूसँग मुलुकलाई नयाँ दिशामा अघि बढाउने कुनै नवीन राजनीतिक–आर्थिक अवधारणा नभएको टिप्पणी गरिएको छ ।

विशेष गरी नयाँ उदाउँदै आएका शक्तिहरूमाथि नेकपाले तीखो प्रहार गरेको छ । घोषणापत्रमा भनिएको छ, “आफूलाई नयाँ भन्ने पपुलिष्ट शक्ति सिद्धान्तहीन र दृष्टिकोणविहीन छन् । यी भदौ २४ को विध्वंश मच्चाउने तत्वसँग जोडिएका शक्ति हुन् ।” यस्ता शक्तिहरूले मुलुकका संरचनागत समस्या समाधान गर्न नसक्ने र उनीहरू देश तथा जनताको हितमा नरहेको दाबी पनि घोषणापत्रमा गरिएको छ ।

त्यसैगरी, राष्ट्रिय प्रजातन्त्र पार्टी (राप्रपा) लाई ‘प्रतिगामी पुनरुत्थानवादी’ शक्तिको रूपमा चित्रित गरिएको छ । जनक्रान्तिबाट उखेलेर फ्याँकिएको सामन्ती राजतन्त्र पुनःस्थापना गर्न खोज्ने प्रवृत्तिले देशलाई पछाडि धकेल्ने प्रयास भइरहेको आरोप नेकपाले लगाएको छ ।

घोषणापत्रमा विगतका जनआन्दोलन र राजनीतिक परिवर्तनको नेतृत्व आफूले गरेको दाबी गर्दै लोकतन्त्र, संघीयता र समावेशी प्रतिनिधित्वजस्ता उपलब्धिहरू आफ्नै पहलका कारण सम्भव भएको उल्लेख गरिएको छ । “हामीले व्यवस्था बदल्यौँ, अब अवस्था पनि हामीले नै बदल्नेछौँ,” भन्ने नारासहित नेकपाले अरू दल गफमा सीमित रहने तर आफूले व्यवहारमै परिवर्तन गरेर देखाउने प्रतिवद्धता व्यक्त गरेको छ ।

नेकपाको नजरमा कुन दल कस्ता ?

वर्ग	दल/शक्ति	नेकपाको मूल्यांकन
क्रान्तिकारी	नेकपा	एकमात्र समाजवादी रूपान्तरण गर्ने शक्ति
यथास्थितिवादी	नेपाली कांग्रेस र नेकपा एमाले	नयाँ दृष्टिकोणविहीन, पुरानै संरचना जोगाउने
पपुलिष्ट	रास्वपा लगायत नयाँ शक्ति	सिद्धान्तहीन, भदौ २४ का विध्वंशकारीसँग जोडिएको
प्रतिगामी पुनरुत्थानवादी	राप्रपा	राजतन्त्र फर्काउने प्रयास, देश पछाडि धकेल्ने